በደቡብ አፍሪካ የሚኖሩ የዎላይታ ተወላጅ ኢትዮጵያውያን ለዎላይታ ማህበረሰብ ማህበራዊና ኢኮኖሚያዊ ጉዳዮች የሚሰራ “ቱሳ ህብረት” የተባለ ማህበር መመስረታቸው ተነግሯል።
ይህ ውሳኔ ከሁሉም የአገሪቱ ማዕዘናት የተውጣጡ የዎላይታ ተወላጆች እና ሌሎች እንግዶች በተገኙበት በራስተንበርግ ከተማ በተካሄደው የሰላም እና የአንድነት ኮንፈረንስ ላይ ተወስኗል።



የኮንፈረንሱ መሪ ቃል “መጪውን ጊዜ በጋራ እንሰራለን” የሚል ነበር።
የአምባሳደር ደሊል ከድር የመልዕክት ድጋፍ
በደቡብ አፍሪካ የኢፌዴሪ ባለሙሉ ሥልጣን አምባሳደር የሆኑት ክቡር አምባሳደር ደሊል ከድር የዕለቱ የክብር እንግዳ በመሆን ባስተላለፉት መልዕክት፣ የተደራጀ አካል ፍላጎቱንና ጥቅሙን ከማሳካትም በላይ አቅም እንደሚፈጥር ገልጸዋል።
በመሆኑም፣ በደቡብ አፍሪካ እና አካባቢው የሚገኙ ኢትዮጵያውያን ሁሉ ለጋራ አገራዊ አንድነት፣ ሰላም እና ልማት ዓላማ ተደራጅተው እንዲሰሩ መክረዋል፤ ድጋፋቸውንም አረጋግጠዋል።
አምባሳደሩ በተለይ የዎላይታ ማህበረሰብ በኢትዮጵያ መንግስት ግንባታ ላይ የራሱ ጉልህ ድርሻ ያለው እና ባለብዙ ታሪክ እንደሆነ በመጥቀስ፣ በዚህ የአንድነትና የሰላም ኮንፈረንስ የራሱን ማህበር ለመፍጠር መዘጋጀቱን አድንቀዋል።
በቀጣይም ለሚሰሩ ስራዎች አስፈላጊውን ድጋፍና ምክር ለመስጠት ቃል በመግባት የአዘጋጅ አካላትንና ታዳሚዎችን አመስግነው በቀጣይ የተሻለ ውጤትና ትብብር እንደሚጠበቅ አጽንኦት ሰጥተዋል።
በኮንፈረንሱ የተሳተፉ ተወላጆች በምክክርና ውይይት አንድነት መፍጠር እና በጋራ መስራት ተገቢና አስፈላጊ እንደሆነ ከስምምነት ላይ ደርሰዋል። በተበጣጠሰ ሁኔታ በቡድን ወይም በግለሰብ ደረጃ ከመንቀሳቀስ ይልቅ በጋራ በመስራት የዎላይታን ማህበረሰብ በሀገር ውስጥም ሆነ በውጭ በተሻለ ሁኔታ መደገፍ እንደሚቻል እምነት ፈጥረዋል።



በዚህ ውይይትና መተማመን ምክንያት በደቡብ አፍሪካ የሚኖሩ የዎላይታ ተወላጆችን የሚያስተባብር “ቱሳ ህብረት” የተባለ ማህበር ለማደራጀት ተወስኗል።
ለህብረቱ ሥራ አስፈፃሚ ኮሚቴ እና አማካሪ ምክር ቤት አባላትም ተመርጠዋል።
የጉባኤው ተሳታፊዎች እጅ ለእጅ ተያይዘው በጋራ ለመስራት፣ እንዲሁም በደቡብ አፍሪካ ካሉ ሌሎች ኢትዮጵያውያን ጋር በመተባበር የአገራችንንና የአካባቢያችንን ልማት ለመደገፍ፣ በጋራ ለመስራት እና የሀገራችንን እድገት ለመደገፍ ቃል ገብተዋል።
ይህም ሂደት ተጠቃሚ የሚያደርግ ስራ ለመስራት ያለመ ነው።
ኮንፈረንሱ በቀጣይነት በየዓመቱ በተለያዩ ከተሞች በቂ ዝግጅት ተደርጎበት ሁሉንም ተወላጆች በማሳተፍ እንዲካሄድ ወስኗል።
የጁላይ 13 ቀን 2025 ዕለትም ለመገናኘት ምክንያት ሆኖ እንዲታወስ ተወስኗል።
በተጨማሪም፣ ህብረቱ በቀጣይ ስድስት ወራት ውስጥ የተመዘገበ የህግ ሰውነት እንዲኖረው ኮንፈረንሱ አሳስቧል።