በጋሞ ዞን አርባምንጭ በገዳም በተፈፀመው ከባድ ስርቆት ወንጀል በተመለከተ አመራሮች የወንጀለኛውን ማንነት መደበቃቸው በአከባቢው ተወላጆች ውዝግብ ማስነሳቱ ተገለፀ።
በደቡብ ኢትዮጵያ ክልል፣ ጋሞ ዞን፣ አርባምንጭ ከተማ በሚገኘው በቤሬ ደብረ ጽዮን ቅድስት ማርያም ገዳም ከባድ የስርቆት ሙከራ ሲፈጽም እጅ ከፍንጅ የተያዘው ተከሳሽ አቶ አስከን የኔአለም ባውቄ የ6 ዓመት ከ9 ወር ፅኑ እስራት እንደተፈረደበት የአርባምንጭ ከተማ አስተዳደር ፍትህ መምሪያ አስታውቋል።


ይህ የወንጀል ፍርድ በሕግ የበላይነት ደረጃ አድናቆት ቢቸረውም፣ የመንግሥት ኮሙዩኒኬሽን የወንጀለኛውን ማንነት አቀራረብ በተመለከተ በአካባቢው ነዋሪዎች ዘንድ አዲስ ውዝግብና ትችት ቀስቅሷል።
በቀን 11/03/2018 ዓ.ም ረፋድ ላይ፣ ዕድሜው 42 የሆነው ተከሳሽ አቶ አስከን የኔአለም ባውቄ፣ በገዳሙ ውስጥ ማንም በማይገኝበት ሰዓት አውቶማቲክ ሴንጢ እና ሁሉንም መክፈት የሚችል ማስተር ቁልፍ በመጠቀም፣ በግምት ከ150 ሺህ ብር በላይ የሆነ የሙዳይ ሳጥን ገንዘብ ሊሰርቅ ሲዘጋጅ፣ በገዳሙ ጥበቃ ሠራተኛ እጅ ከፍንጅ መያዙን የመንግሥት ኮሙዩኒኬሽን ዘግቧል።

የአርባምንጭ የመጀመሪያ ደረጃ ፍርድ ቤትም ተከሳሹን የኢፌድሪ የወንጀል ሕግ አንቀጽ 27/1/ እና 669(1/ሀ) (በቤተ እምነቶች ላይ የሚፈፀም ከባድ የስርቆት ወንጀል) መተላለፉን በማረጋገጥ የፅኑ እስራት ውሳኔ አስተላልፏል።
የፍትህ መምሪያው፣ “የመኖሪያ አድራሻቸውና ማንነታቸው የማይታወቁ ግለሰቦች እስከ እምነት ተቋም በመዝለቅ… ወንጀል ለመፈፀም ሙከራ ማድረግ በከተማው ያልተለመደ ስለሆነ ሕብረተሰቡና ምዕመኑ ጥንቃቄ ሊወስድ ይገባል” ሲል አሳስቧል።
WT Media ያገኘው መረጃ እንደሚያመለክተው፣ የአካባቢው ነዋሪዎችና ተወላጆች የመንግሥት ኮሙዩኒኬሽን መግለጫ ላይ ትልቅ ጥያቄ አቅርበዋል።
መንግሥት የወንጀል ድርጊቱን በግልጽ ሲገልጽ፣ የተከሳሹን አድራሻ ግን “ነዋሪነቱ በሌላ አካባቢ የሆነ ተከሳሽ” በሚል በግልጽ አለመጥቀሱን ተከትሎ ትችት አቅርበዋል።
በርካታ የአካባቢው ተወላጆች “በጋሞ ዞን የሚፈፀም ወንጀል የአካባቢው አመራሮች ተባባሪ ስለሆኑ ነው የወንጀለኛውን የመጣበት አካባቢ ለመጥቀስ ያልፈለጉት” የሚል ጠንካራ አስተያየት እየሰጡ ነው።
ይህ ውዝግብ የሚመነጨው WT Media ከቀናት በፊት በዘገበው የጋራ ስጋት ነው።
ከዚህ ቀደም የጋሞ ተወላጆች “ከአማራ ክልል የመጡ ግለሰቦች በሕብረተሰቡ ላይ ጉዳት እያደረሱ ነው” ሲሉ መግለጻቸው ይታወቃል።
በተቃራኒው ደግሞ፣ በአርባምንጭ አካባቢ የሚኖሩ የአማራ ተወላጆች “ጥቃት እየደረሰብን ነው” የሚል ቅሬታ ማቅረባቸው ይታወቃል።
የመንግሥት ኮሙዩኒኬሽን አሁን ላይ “ነዋሪነቱ በሌላ አካባቢ” በማለት የዘርፉን ጉዳይ አሳንሶ ማቅረቡ፣ የአካባቢው አመራሮች በዞኑ የሚፈጸሙ ወንጀሎችን ከየትኛውም ብሔር ጋር የማያያዝ አዝማሚያን ለመሸፈን እየሞከሩ ነው የሚል ጥርጣሬን ፈጥሯል።
በአጠቃላይ፣ ገዳሙ ላይ የተፈጸመው የስርቆት ሙከራ በሕግ ምላሽ ቢያገኝም፣ የወንጀለኛው ማንነት አቀራረብ በከተማዋ ለቆየው የብሔር ተኮር ወንጀል ውዝግብ አዲስ የውይይት ርዕስ ሆኗል።
🎙️ ማሳሰቢያ፦ WT Media በተለይ በደቡብ ኢትዮጵያ ክልል፣ በመንግሥት ሚዲያዎች ትኩረት ያላገኙ ለተጨቆኑ የሕብረተሰብ ክፍሎች ጉዳይ የቅድሚያ ቅድሚያ የምንሰጥ ሲሆን እውነትን፣ ሀቅንና ፍትሕን መሠረት በማድረግ፣ የመረጃ ሰጪዎችን ምስጢርና ደኅንነት በመጠበቅ በሌሎች ሚዲያዎች የማይሰሙ የጭቁኖች ድምፅ ዘውትር እዚሁ ይሰማልና ስለአብሮነታችሁ ምስጋናችን የላቀ ነው! የእናንተው የጭቁኖች አገልጋይ ነን🙏
Voice of Marginalized Community – WT Media
Ethiopia #southethiopia #wtmedia #Gamo #አርባምንጭ
Read more on our official Website