የኢትዮጵያ አየር መንገድ በበኩሉ በመጥፎ የአየር ጸባይ ምክንያት ወደ አዲስ አበባ ቦሌ ዓለም አቀፍ አየር ማረፊያ የሚደረጉ በረራዎች በአቅራቢያ በሚገኙ አየር ማረፊያዎች እንዲያርፉ እየተደረጉ ነው ብሏል።
አየር መንገዱ በትዊተር ገጹ በቦሌ አየር ማረፊያ እና አቅራቢያው ለአየር በረራ መጥፎ የሚባል የአየር ሁኔታ መኖሩን አመላክቷል።
የበረራ ደህንነት ማረጋገጥ ቅድሚያ የሚሰጠው ጉዳይ ነው ያለው አየር መንገዱ አውሮፕላኖች በአቅራቢያ በሚገኙ አየር ማረፊያዎች እንዲያርፉ መደረጉ የቅድመ ጥንቃቄ አካል መሆኑን አስታውቋል።
ምንም እንኳ በዚህ መጥፎ አየር ጸባይ ምክንያት የተስተጓጎሉ አውሮፕላኖች ብዛትም ይሁን ወደ የትኛው አየር ማረፊያ እያረፉ እንደሆነ ባይገልጽም ፍላይትራዳር 24 የተሰኘው ድረ-ገጽ አውሮፕላኖች ወደ የትኞቸቹ አየር ማረፊያዎች እንዲያርፉ እንደተደረገ አሳይቷል።
እንደ ፍላይትራዳር24 መረጃ ከሆነ ከትናንት እሁድ ጀምሮ እስከ ሰኞ ረፋድ ድረስ ከ35 የማያንሱ መዳረሻቸውን አዲስ አበባ አድርገው የነበሩ በረራዎች ወደ ሌሎች አየር ማረፊያዎች እንዲያመሩ ተደርገዋል።
ከኢትዮጵያ አየር መንገድ በተጨማሪ በዚህ መጥፎ የአየር ጸባይ ምክንያት በረራዎቻቸው ከተስተጓጎሉባቸው አየር መንገዶች መካከል የኳታር እና ቱርክ አየር መንገዶች ይገኙባቸዋል።
መነሻቸውን ከጋምቤላ፣ ኦሶሳ፣ ሰመራ አድርገው የነበሩት በጎንደር አየር አየር ማሪፈያ ሲርፉ፤ ከሰመራ እና ከኬንያዋ የባህር ዳርቻ ከተማ ሞምባሳ የተነሱት አውሮፕላኖች ባህር ዳር አርፈዋል።
ከኢስታንቡል፣ ዶሃ፣ ካርቱም፣ ዱባይ፣ ጁባ፣ ማፑቶ እና ሌጎስ የተነሱ አውሮፕላኖች ወደ ጂቡቲ ኢንዲያቀኑ ከተደረጉት በረራዎች መካከል ተጠቃሽ ናቸው።
ከዋሽንግተን፣ ጆሃንስበርግ እና ብራሰልስ የተነሱት አውሮፕላኖች ናይሮቢ ኬንያ ያረፉ ሲሆን፤ መነሻቸውን ስቶኮልም እና ጄኔቫ የነበሩት አውሮፕላኖች ሱዳን ካርቱም አርፈዋል።
ከሪያድ የተነሳው አውሮፕላን አስመራ ሲያርፍ ከሃርጌሳ የተሳው ደግሞ ድሬ ዳዋ እንዲያርፍ ሆኗል።
አዲስ አበባ ቦሌ ዓለም አቀፍ አየር ማረፊያ የሚያርፉ እና የሚነሱ ከፍተኛ ቁጥር ያላቸው አውሮፕላኖችን በቀን ያስተናግዳል።
እንደ ፍላይትራዳር24 መሠረት ዛሬ ብቻ ከ120 በላይ አውሮፕላኖች በአዲስ አበባ ቦሌ ዓለም አቀፍ አየር ማረፊያ ያርፋሉ ተብሎ ይጠበቃል።
የኢትዮጵያ አየር መንገዱ የአየር ሁኔታው ሲሻሻል አውሮፕላኖች ወደ ቀደም መዳረሻቸው ይመለሳሉ ብሏል በመግለጫው።
አየር መንገዱ ጨምሮም ከአቅም በላይ በሆነ ምክንያት ለተፈጠረው ችግር ደንበኞችን ይቅርታ የጠየቀ ሲሆን አየር ጸባይ ሲስተካከል አሳውቃለሁ ብሏል ሲል ቢቢሲ ዘግቧል።
ዝርዝር ወቅታዊ፣ ትኩስ እንዲሁም ሚዛናዊ መረጃዎችን ለማግኘት፡-
ዌብሳይት
www.wolaitatimes.com.et
ፌስቡክ፡-
https://www.facebook.com/wolaitatime/
ቴሌግራም፦
https://telegram.me/Kiikiya
ዩቲዩብ፦
https://m.youtube.com/channel/UCQy9hoOijiE8FStts2SmtXw?noapp=1
በመጠቀም መረጃዎችን ማግኘት ይቻላል።
Wolaita Times, 19/11/13 E.C , Sodo, Ethiopia🇪🇹
