በደቡብ ኢትዮጵያ ክልል የኮሬ ዞን ነዋሪዎች፣ በተለይም እናቶች፣ የነጭ ሳር መንገድ ተዘግቶ በመቆየቱ ምክንያት ለከፍተኛ ስቃይ፣ ለኢኮኖሚ ድቀትና ለሥነ-ልቦና ቀውስ መዳረጋቸውን ለ WT Media በምሬት አስረድተዋል።
WT Media ጉዳዩን በተመለከተ ከአመራሮች ምላሽ ለማግኘት ጥረት ቢያደርግም፣ የሚመለከታቸው አካላት ምላሽ ለመስጠት ፈቃደኛ ሳይሆኑ ቀርተዋል።
1. የአገር አቋራጭ ተሳቢ የሚመስለው የእናቶች ጉዞ
ከኮሬ ዞን ከዳርባና ዬሮ አካባቢ ተነስተው ወደ አርባ ምንጭ የሚጓዙ እናቶች የሚገጥማቸው ፈተና እጅግ ዘግናኝ ነው፦

- አካላዊ እንግልት፦ እናቶች ልክ እንደ አገር አቋራጭ ተሳቢ ከባድ ዕቃቸውን ተሸክመው ቀን በፀሐይ፣ ሌሊት ደግሞ በዝናብና በብርድ ሳይበገሩ ረጅሙን መንገድ በእግራቸው ይጓዛሉ።
- የአራዊት ስጋት፦ በተለይ ሌሊት በነጭ ሳር ጫካ ውስጥ አረፍ በሚሉበት ወቅት የዱር አራዊት ድምፅ ከሩቅ ሲሰሙ ከፍተኛ የሆነ የሥነ-ልቦና መረበሽና ፍርሃት ውስጥ እንደሚወድቁ ነዋሪዎች ገልጸዋል።
- ተስፋ የቆረጠ ጸሎት፦ እናቶቹ ከፍርሃታቸው የተነሳ በጨለማ ጸሎት በመጀመር ንጋት ሳይተካ ጉዟቸውን በመቀጠል አርባ ምንጭ ለመግባት ይገደዳሉ።
2. “የዱር እንስሳት ይደነግጣሉ” የሚለው ሰበብና ታሪካዊ እውነታው
የአካባቢው የሀገር ሽማግሌዎች እንደሚሉት፣ የኮሬ ማህበረሰብ እስከ 1990ዎቹ መጨረሻ ድረስ በነጭ ሳር ፓርክ መሃል ወደ አርባ ምንጭ መኪና በመንዳት የንግድ ልውውጥ ያደርጉ ነበር።


- የንግድ ታሪክ፦ ቀደም ሲል ከአርባ ምንጭ ዜሮ ሶስት መነሻ በማድረግ እስከ ዳርባ ኬሌ ድረስ ላንድክሩዘር መኪናዎች በፓርኩ ውስጥ ይመላለሱ እንደነበር ተገልጿል።
- ተረት የሆነው ሰበብ፦ “በፓርኩ መሃል መኪና ከተነዳ የዱር እንስሳት ይደነግጣሉ” የሚለው ምክንያት በኋላ የመጣና ማህበረሰቡን ለማሰቃየት የቀረበ ተረት ነው ሲሉ ሽማግሌዎቹ ይወቅሳሉ።
3. የአመራሮች ዝምታና “የእድሜ ይፍታህ” ስቃይ
የነጭ ሳር መንገድ መዘጋት በኮሬ ማህበረሰብ ላይ የንግድ፣ የትምህርትና የጤና አገልግሎት እጦት በማስከተል ኑሮውን “የምድር ላይ ሲኦል” አድርጎታል። ይህንን ችግር ለበላይ አካል አቅርቦ የህዝብን እንግልት ማስቆም የነበረባቸው አመራሮች ግን የዳር ተመልካች ሆነዋል።

WT Media ጉዳዩን ለኮሬ ዞን ከፍተኛ አመራሮችና ለደቡብ ኢትዮጵያ ክልል መንግስት ለማቅረብ በተደጋጋሚ ቢሞክርም፣ አካላቱ ለህዝቡ ስቃይ ምላሽ ከመስጠት ይልቅ ዝምታን መርጠዋል። ይህ የአመራሮች ምላሽ የመንፈግ ድርጊት ችግሩ ሆን ተብሎ እንዲቀጥል እየተደረገ መሆኑን ያሳያል ሲሉ ነዋሪዎች ቅሬታቸውን ገልጸዋል።
🎙️ ማሳሰቢያ፦ WT Media በተለይ በደቡብ ኢትዮጵያ ክልል፣ በመንግሥት ሚዲያዎች ትኩረት ያላገኙ ለተጨቆኑ የሕብረተሰብ ክፍሎች ጉዳይ የቅድሚያ ቅድሚያ የምንሰጥ ሲሆን እውነትን፣ ሀቅንና ፍትሕን መሠረት በማድረግ፣ የመረጃ ሰጪዎችን ምስጢርና ደኅንነት በመጠበቅ በሌሎች ሚዲያዎች የማይሰሙ የጭቁኖች ድምፅ ዘውትር እዚሁ ይሰማልና ስለአብሮነታችሁ ምስጋናችን የላቀ ነው! የእናንተው የጭቁኖች አገልጋይ ነን🙏
Voice of Marginalized Community – WT Media
#Ethiopia #SouthEthiopia #KoreZone #Nechisar #RoadSafety #Justice #ደቡብኢትዮጵያ #ኮሬ #ነጭሳር #ፍትሕ #WTMedia