የዎላይታ የሶዶ ዩንቨርስቲ ለሀገር ሠላም እሴት ግንባታ የአከባቢውን የሀገር ሽማግሌዎችና የሀይማኖት አባቶችን በማሳተፍ አንድነትና አብሮነትን ለማጠናከር ዘርፈ ብዙ ተግባራትን ሲያከናውን መቆየቱን ነው የዩንቨርስቲው ፕረዚዳንት ፕሮፌሰር ታከለ ታደሰ ተናግረዋል።
በዚህም ባለፉት ሶስት ዓመታት አበረታች ለውጦች መመዝገቡንና በቀጣይም የአከባቢውን ዘላቂ ሠላም በተገቢው ለማረጋገጥ እንዲያስችል ከሃይማኖት አባቶችና ሀገር ሽማግሌዎች ጋር በቅንጅት እየተሰራ መሆኑንም ፕሮፌሰሩ አብራርተዋል ።
ለዚህም የመተሳሰብ ባህልን በይበልጥ ማጠናከር ወሳኝ መሆኑን የሚናገሩት ፕሮፌሰር ታከለ ሁሉም ዜጎች የሀገርን ሉዓላዊነት ለማስጠበቅ በሚደረገው ርብርብ በቆራጥነት መነሳት አለባቸው ብለዋል።
ሀገርን ለማፍረስ ለሚደረገው ማንኛውም እንቅስቃሴ በጋራ መታገል ያስፈልጋል ያሉት ፕሬዘዳንቱ ይህችን ሀገር በማሻገር የኢትዮጵያውያን ጀግንነት በዓለም ማስመስከር አለብን ስሉ ተናግረዋል።
ያነጋገርናቸው በዞኑ የሚገኙ የሀይማኖት አባቶችና የሀገር ሽማግሌዎችም የአካባቢውን ብሎም የሀገሪቱን ሠላም የማስጠበቅ ጉዳይ ከግብ ለማድረስ የጋራ ትግል ወሳኝ መሆኑን ጠቁመዋል።
የደቡብ ሬድዮና ቴሌቨዢን ከዋካ ቅርንጫፍ ጋዜጠኛ በቀለች ጌቾ ዘገባ እንደሚያመለክተው ሀገርን የማሻገር ጉዳይ የዜግነት ግዴታ ከመሆኑም ባሻገር የማንነትም ጉዳይ ጭምር በመሆኑ ይህንን በተገቢው ለማረጋገጥ እንዲያስችል ሀገርን የሚወድ ትውልድ ለመፍጠር ከፍተኛ ትግል እንደሚያስፈልግም ጠቁመዋል።


