በ2013 በጀት ዓመት ሀብታቸውን በትክክል ስለማስመዝገባቸው የማረጋገጥ ሥራ ከተሰራባቸው ሀብት አስመዝጋቢዎች መካከል 47% የሚሆኑት ያስመዘገቡት የሀብት መረጃ የተሳሳተ ነው፡፡
በሀብት ማሳወቅና ምዝገባ አዋጅ ቁጥር 668/2002 አንቀጽ 11 መሰረት የፌደራል የሥነምግባር እና የፀረ-ሙስና ኮሚሽን የተመዘገበን ሀብት መረጃ ትክክለኛነት እንዲያረጋግጥ ሥልጣን ተሰጥቶታል፡፡
በመሆኑም ኮሚሽኑ በ2013 በጀት ዓመት ለሙስና ተጋላጭ በሆኑ ዘርፎች ላይ በሚሰሩ 386 ሀብት አስመዝጋቢዎችና ቤተሰቦቻቸው ላይ የሀብት ምዝገባ ትክክለኛነትን የማረጋገጥ ሥራዎች ሰርቷል፡፡
በዚህ መሠረት በበጀት ዓመቱ የመረጃ ትክክለኛነትን የማረጋገጥ ተግባር ከተከናወነባቸው ሀብት አስመዝጋቢዎች መካከል 47 በመቶ የሚሆኑት ያስመዘገቡት ሀብት ትክክለኛነት የጎደለው መሆኑ ተገልጿል፡፡
አብዛኛዎቹ ሀብት አስመዝጋቢዎች ባስመዘገቡት ሀብት ላይ መጠነኛ ልዩነት የተስተዋለባቸው በመሆኑ የጽሁፍ ማስጠንቀቂያ ተሰጥቷቸው እንዲያስተካክሉ እየተደረገ ሲሆን 13 ሀብት አስመዝጋቢዎች ደግሞ ባስመዘገቡት ሀብትና ባላቸው ሀብት መካከል ያለው ልዩነት ከፍተኛ በመሆኑ በሕግ እንዲጠየቁ ለተጨማሪ ምርመራ መረጃዎቻቸው ለፍትህ አካላት ተልኳል፡፡
በተካሄደው የሀብት ምዝገባ መረጃ ትክክለኛነት የማረጋገጥ ሥራ ከተገኙ ልዩነቶች መካከል በአንድ ግለሰብ ስም ሳይመዘገብ የቀረ በተለያዩ የሂሳብ ቁጥሮች ከ4 ሚሊዮን ብር በላይ ተቀማጭ ገንዘብ መገኘቱ፤ አንድ ግለሰብ ሳያስመዘግባቸው የቀረ 4 መኖሪያ ቤቶች መገኘታቸው፤ ተሽከርካሪ እና ሌሎችም ግኝቶች የታዩ እና ግኝቶቹም በሀብት ምዝገባ ወቅት አስመዝጋቢዎቹ ሳያስመዘግቧቸው የቀሩ መሆናቸው ተረጋግጧል፡፡
የሀብት ምዝገባ መረጃ ትክክለኛነት የማረጋገጥ ሥራ ሲሰራ ኮሚሽኑ በአዲስ አበባ እና በክልል ከተሞች ከሚገኙ ከ105 ተቋማት በላይ መረጃዎችን ሰብስቧል፡፡
መረጃዎቹ የገንዘብ እንቅስቃሴን በሚመለከት ከመንግስት እና ከግል ባንኮች፣ አክስዮን ድርሻ ስለመኖሩ ለማረጋገጥ ከግል ባንኮችና ኢንሹራንስ ተቋማት፣ ተሽከርካሪ ስለመኖሩ ለማረጋገጥ በሁሉም ክፍለ ከተሞች ከሚገኙ የአሽከርካሪ ተሽከርካሪ ፍቃድ ሰጪ ተቋማት፣ ሪል ስቴት መኖሪያ ቤት ስለመኖሩ ለማረጋገጥ በተመረጡ የሪልስቴት ተቋማት፣ የቤት/መሬት ይዞታ ስለመኖሩ ለማረጋገጥ በሁሉም ክፍለ ከተሞች በሚገኙ የይዞታ አስተዳደር እና የይዞታ መረጃ ኤጀንሲ ተቋማት፣ የንግድ ድርጅት ስለመኖሩ ለማረጋገጥ ከንግድ ሚኒስቴር፣ ከአዲስ አበባ ንግድ ቢሮ እና ከሌሎች አግባብነት ካላቸው ተቋማት የተሰበሰቡ ናቸው ተብሏል፡፡
እንደ ኮሚሽኑ ዘገባ በአጠቃላይ በሕጉ መሰረት ሀብት አስመዝጋቢዎች የሚያስመዘግቡት ሀብት ትክክለኛ እና እውነተኛ ሊሆን ይገባል፡፡ ነገር ግን የሀብት መጠንን በመደበቅ ወይም በመጨመር የተሳሳተ የሀብት ምዝገባ መረጃ ማስመዝገብ ውጤቱ ምንጩ እንዳልታወቅ ሀብት ተቆጥሮ በሕግ የሚያስጠይቅና ሀብቱን የሚያስወርስ መሆኑን መገንዘብ ያስፈልጋል ተብሏል፡፡
ዝርዝር ወቅታዊ፣ ትኩስ እንዲሁም ሚዛናዊ መረጃዎችን ለማግኘት፡-
ዌብሳይት
www.wolaitatimes.com.et
ፌስቡክ፡-
https://www.facebook.com/wolaitatime/
ቴሌግራም፦
https://telegram.me/Kiikiya
ዩቲዩብ፦
https://m.youtube.com/channel/UCQy9hoOijiE8FStts2SmtXw?noapp=1
በመጠቀም መረጃዎችን ማግኘት ይቻላል።
Wolaita Times, 03/12/13 E.C , Sodo, Ethiopia🇪🇹
