የኢትዮጵያ ኤሌክትሪክ አገልግሎት በዲስትሪቢዩሽን መስመሮች እርጅና ምክንያት በከተሞች አካባቢ እያጋጠመ ያለውን የኃይል መቆራረጥና መዋዥቅ ችግር ለመቅረፍ እያከናወነ ያለውን የ6ቱ ከተሞች የዲስትሪቢዩሽን መስመር መልሶ ግንባታና አቅም ማሳደግ ፕሮጀክት በተያዘለት ጊዜ ለማጠናቀቅ እየሰራ መሆኑን የስድስቱ ከተሞች የዲስትሪቢዩሽን ኔትወርክ መልሶ ግንባታ እና አቅም ማሳደደግ ፕሮጀክት ኃላፊ የሆኑት አቶ ምንተስኖት ተስፋየ ገልፀዋል፡፡
ፕሮጀክቱ የከተሞችን በፍጥነት ማደግ ተከትሎ እየጨመረ የመጣውን የሃይል ፍላጎት መሸከም የሚችል የዲስትሪቢዩሽን መስመር በመዘርጋት እየተፈጠረ የሚገኘውን የሃይል መቆራረጥና መዋዥቅ ችግር በከፍተኛ ሁኔታ ለመቅረፍ እንደሚረዳ አቶ ምንተስኖት ገልፀዋል፡፡
ፕሮጀክቱ በህንድና በቻይና ተቋራጮች አማካኝነት እየተገነባ መሆኑን የተናገሩት ሀላፊው ግንባታው በሶስት ሎት ተከፍሎ እየተካናወነ መሆኑን ጠቅሰዋል፡፡
ጨምረውም በሎት 1 የዎላይታ ሶዶና ሀረር፣ በሎት 2 የሻሸመኔና ደብረ-ማርቆስ፣ በሎት 3 ጎንደር ከተሞች የዲስትሪቢዩሽን መስመሮች መልሶ ግንባታ ይከናወናል ብለዋል፡፡
በሎት አንድ ለሚከናወነው የዲስትሪቢዩሽን መስመር መልሶ ግንባታ ስራ መሰረታዊ ዲስትሪቢዩሽን ዕቃዎች የዲዛይንና የቴክኒካል ስፔሲፊኬሽን የማጽደቅ ስራ መጠናቀቁን የተናሩት አቶ ምንተስኖት የመካከለኛ እና የዝቅተኛ መስመር ኤሌክትሪክ ኮንዳክተሮች፣ የመስመር ማቋረጫ እና መከላከያ መሳሪያዎች፣ የዲስትሪቢዩሽን ትራንስፎርመሮች እና የልዩ ልዩ ግብዓቶች የፋብሪካ ምርት ተጠናቆ በፍተሻ እና በማጓጓዝ ሂደት ላይ መሆኑን ጠቁመዋል፡፡
የከተሞቹ የመካከለኛና የዝቅተኛ መስመር የምሰሶ ማቆም ስራ የኮንትራቱን 16.97 በመቶ መከናወኑን ገልፀዋል፡፡
በሎት ሁለት እና ሶስት ስር የሚከናወነው የሻሸመኔ፣ ደብረማርቆስ፣ ጎንደርና አዲግራት ከተሞች የዲስትሪቢዩሽን መስመር መልሶ ግንባታ ስራም መሰረታዊ ዲስትሪቢዩሽን ዕቃዎች የዲዛይንና የቴክኒካል ስፔሲፊኬሽን የማፅደቅ ስራ የተጠናቀቀ ሲሆን የመካከለኛ እና የዝቅተኛ መስመር ኤሌክትሪክ ኮንዳክተሮች እና የመስመር ማቋረጫ እና መከላከያ መሳሪያዎች የዲስትሪቢዩሽን ትራንስፎርመሮች እና የልዩ ልዩ ግብዓቶች ወደ ሃገር ውስጥ ገብተው የጥራት ፍተሻ ለማድረግ ዝግጅት እየተደረገ መሆኑን አስታውቀዋል፡፡
ለሻሸመኔና ደብረማርቆስ ከተሞች የዲስትሪቢዩሽን መሰመሮች መልሶ ግንባታ 2948 የመካከለኛና የዝቅተኛ መስመር ምሰሶዎች ተመርተውና የጥራት ፍተሻቸውን አልፈው ወደ ከተሞቹ እየተጓዘ ሲሆን የምሰሶ ተከላ ስራው የኮንትራቱን 27.48 በመቶ ተከናውኗል ብለዋል ኃላፊው፡፡
እንዲሁም በሎት ሶስት በጎንደር ከተማ ለሚከናወነው የዲስትሪቢዩሽን መስመር መልሶ ግንባታ ስራ 2549 የመካከለኛና የዝቅተኛ መስመር ምሰሶዎች ተመርተውና የጥራት ፍተሻቸውን አልፈው ወደ ጎንደር ከተማ መጓጓዛቸውን የጠቆሙት አቶ ምንተስኖት በጎንደር ከተማ የመካከለኛና የዝቅተኛ መስመር የምሰሶ ማቆም ስራ እየተሰራ ሲሆን በዚህም መሰረት 6012 ምሰሶ ተከላ፣ የ542 የዝቅትኛ መስመር አክሰሰሪዎች ገጠማ እንዱሁም የ7.936 ኪ.ሜ የዝቅተኛ መስመር ኬብል የመሳብ ስራ መከናወኑን አብራርተዋል፡፡
ተቋሙ በማህበራዊ ሚዲያ በገለፀው መረጃ መሠረት ስድስቱ ከተሞች ፕሮጀክት ሙሉ በሙሉ ሲጠናቀቅ በከተሞቹ እያደገ የመጣውን የኤሌክትሪክ ኃይል ፍላጎት በማሟላት ያልተቆራረጠ የኤሌክትሪክ አገልግሎት ለተጠቃሚ ደንበኞች ለመስጠት እንዲሁም በቴክኒክ ምክንያት የሚከሰት የኃይል ብክነትን ለመቀነስ ያስችላል ብለዋል፡፡
ፕሮጀክቱን የሚከናወነው ከአለም ባንክ በተገኘ 80 ሚሊዮን የአሜሪካን ዶላር ብድር ሲሆን፤ በተያዘው አመት መጨረሻ ሙሉ በሙሉ ለማጠናቀቅ እየተሰራ መሆኑን ኃላፊው አመላክተዋል።
ዝርዝር ወቅታዊ፣ ትኩስ እንዲሁም ሚዛናዊ መረጃዎችን ለማግኘት፡-
ዌብሳይት
www.wolaitatimes.com.et
ፌስቡክ፡Wolaita Timese/
ቴሌግራም፦
https://telegram.me/Kiikiya
ዩቲዩብ፦
https://m.youtube.com/channel/UCQy9hoOijiE8FStts2SmtXw…
በመጠቀም መረጃዎችን ማግኘት ይቻላል።
#WolaitaTimes, 21/01/14 E.C , Sodo, #Ethiopia🇪🇹
