ከዎላይታ ሶዶ ከተማ ተነስተው ወደ አዲስ አበባ ከተማ በህገ ወጥ መንገድ ሲዘዋወሩ የነበሩ 19 ህጻናትንና 9 አዘዋዋሪ ሴቶችን ከስልጢ ወረዳ ፖሊስ ጽ/ቤት በጋራ በመሆን በቁጥጥር ስር ማዋሉን የስልጤ ዞን ፖሊስ መምሪያ አስታውቋል።

ህጻናቱን ማዳበሪያ በማልበስ አፍነው ሲያጓጉዟቸው እንደነበር የገለጹት የዞኑ ፖሊስ መምሪያ አዛዥ ዋና እንስፔክተር ሸምሱ ሂክማ እድሜያቸው ከ5 እስከ 10 እንደሚሆናቸውም ጠቁመዋል።

ህጻናቱ ወራቤ ከተማ ሲደርሱ ባሰሙት ጩሀት መነሻ ከህብረተሰቡ ለፖሊስ በደረሰው ጥቆማ መሰረት ተከታትሎ ከስልጢ ወረዳ ፖሊስ ጽ/ቤት በመተባበር ህጻናቱንና አዘዋዋሪ እናቶችን አሳኖ ቀበሌ ላይ በቁጥጥር ስር ማዋሉን ገልጸዋል።

ለህጻናቱ ምግብ በመስጠት ከአዘዋዋሪ ሴቶች ጭምር በፖሊስ በማጀብ ለዎላይታ ፖሊስ ለማስረከብ ጉዞ መጀመሩንም ዋና እንስፔክተር ሸምሱ ጠቁመዋል።

አዘዋዋሪ እናቶች በሰጡት አስተያየት በዚህ እኩይ ተግባር ተሳታፊዎች ቁጥር በርካቶች መሆናቸውን ለፖሊስ በመግለጽ በጠዋቱ ክፍለጊዜ ህጻናትን የጫነ አንድ መኪና ወደ አዲስ አበባ መጓዙንም ተናግረዋል።

ሁሌም የሰላም ባለቤት የሆነው ህብረተሰብ የዚህን መሰል የወንጀል ተግባራትን ከጸጥታው አካል ጎን በመሆን ሊከላከልእንደሚገባም እንስፔክተሩ ጥሪ አስተላልፈዋል ስል የስልጤ ዞን መንግስት ኮሙኒኬሽን ዘግቧል።

Leave a Reply

Your email address will not be published. Required fields are marked *