
በደቡብ ኢትዮጵያ ክልል ዎላይታ ዞን በዳሞት ወይዴ ወረዳ ሶስት መምህራን የሐምሌ ወር ደሞዛቸውን ስለጠየቁ ብቻ ትላንት ሐሙስ 7/2/2017 ከሌሉት 9:00 አካባቢ ከቤታቸው በፀጥታ ሀይሎች ታፍነው መወሰዳቸው ቤተሰቦቻቸው ለዎላይታ ታይምስ ሚዲያ ገልጸዋል።
እንደ ቤተሰቦቻቸው ገለፃ በፀጥታ ሀይሎች ታፍነው የተወሰዱት መምህራን በአከባቢያቸው ባለው ፓሊስ ጣቢያ ሳይሆን ዎላይታ ሶዶ ከተማ ላይ ሰሊሆም ኮሌጅ አጠገብ በሚገኘው ፖሊስ ጣቢያ ታስረው እንደሚገኙ አስረድተዋል።
እነኚህ የሰሩበትን ደመወዝ የጠየቁ መምህራን፦ መ/ር ወንድምዓለም ሙላቱ፣ መ/ር ዳንኤል ፋልታሞ እና መ/ር መስፍን ዳዊት ስለመሆኑ ተገልጿል።
በተያያዘ ዜና የዎላይታ ታይምስ ሚዲያ ባገኘው መረጃ መሰረት፦ በዞኑ የከተማና ወረዳ አስተዳደሮች ውስጥ የሚገኙ ጤና ጣቢያዎች እና ጤና ኬላዎች ትግቢውን አገልግሎት እየሰጡ እንዳልሆነ የተረጋገጠ ሲሆን በዚህም ምክንያት በተለይም በግል የጤና ተቋማት ለመታከም ዐቅም የሌላቸውና ከዚህ በፊት በማኅበረሰብ ጤና መድኅን ሽፋን በነዚህ ተቋማት አገልግሎት ሲያገኙ የቆዩ የማኅበረሰብ ክፍሎች በከፋ የጤና ችግር ውስጥ ይገኛሉ።
በዞኑ በሚገኙ ወረዳ ውስጥ ለመምህራኑ ተገቢው ደመወዝ በወቅቱ ባለመከፈሉ ምክንያት የመንግሥት ትምህርት ቤቶች ከሚያዚያ ወር መጀመሪያ ሳምንት ጀምሮ ከ65 በመቶ በላይ መማር ማስተማር ስራ ተቋርጧል፡፡
የመንግስት ሰራተኛ በቂ የኑሮ ደረጃ የማግኘት መብት ተነፍጎ በዞን ውስጥ የሚሠሩ ብዙ ሺህ የመንግሥት ሠራተኞች በተቆራረጠ ክፍያ እና ደመወዝ ሙሉ በሙሉ በመቋረጡ ምክንያት ለከፋ ኢኮኖሚያዊና ማኅበራዊ ችግሮች ተጋልጠዋል።
ሠራተኞቹ ሌላ ገቢ እንደሌላቸውና ደመወዝ በመቋረጡ ምክንያት ለራሳቸው እና ለቤተሰቦቻቸው የዕለት ጉርስ ለማግኘት እንደተቸገሩ፣ የቤት ኪራይ መክፈል እንዳልቻሉ፣ ከደመወዝ ጋር በተያያዘ በሚስተዋሉ ችግሮች ምክንያት ብድርም ማግኘት ስላልቻሉ ሕይወታቸውን ለማቆየት የቤት እቃ በመሸጥ ላይ ይገኛሉ።
አሁን አሁን በአከባቢው ደመወዝ መጠየቅ ወንጀል እስኪመስል ድረስ ተጠያቂነት በሌለበት ሁኔታ የደመወዝ ክፍያ በፈለገበት ሰዓት ቆራርጦ መክፈል የተለመደ እና ህጋዊ አሰራር ከሆነ ረጅም ጊዜ አስቆጥሯል፡፡
ከዚህም የተነሳ የሰራተኛው ህይወት ከድጡ ወደማጡ እንዲገባ በመዳረጉ አቤቱታቸውን እንኳን የሚሰማ ጠፍቶ ችግሮች እየተባባሱ ከዕለት ወደዕለት ወደ ባሰ ድህነት ውስጥ ሰራተኛው እንዲገባ ተዳርጓል፡፡
ከሁሉም በላይ ከደመወዝ አለመከፈል ጋር ተያይዞ ቅሬታ እና ተቃውሞ ባሰሙ፤ ፍትህ በጠየቁ ግለሰቦች ላይ ማስፈራራት፣ ዛቻ፣ ጭምር እየደረሰባቸው የሚገኝ ስለሆነ የፌዴራል የመንግሥት፤ የክልል የመንግሥት እና የዞን የመንግሥት አፋጣኝ መፍትሔ እርምጃዎችን በመውሰድ ለሠራተኞች ደመወዝ ወቅቱን ጠብቆ መከፈሉን እና ሰብአዊ መብቶቹ መከበራቸውንና መጠበቃቸውን እነዲያረጋግጡ ጥሪ ቀርቧል።
የሥራ መብት በተለያዩ ዓለምአቀፍና አህጉርአቀፍ የሰብአዊ መብቶች ሰነዶች ዕውቅና ካገኙ መሠረታዊ ሰብአዊ መብቶች አንዱ ሲሆን የሥራ መብት የሠራተኞች ደመወዛቸውን በሙሉና በወቅቱ የማግኘት መብትንም የሚጨምር ሲሆን ለሠራተኞች ተገቢውን ደመወዝ እና ሌሎች ክፍያዎችን በወቅቱ አለመክፈል ሠራተኞች እራሳቸውን እና ቤተሰባቸውን ማስተዳደር የሚችሉበትን መንገድ የሚገድብ እና የሥራ መብት ጥሰት ሆኖ የሚቆጠር ነው ይላል፡፡
የዓለም አቀፉ የሥራ ድርጅት በደመወዝ ጥበቃ ስምምነት 1949 (ቁጥር 95) አንቀጽ 12 እና በደመወዝ ጥበቃ ምክረ ሐሳብ 1949 (ቁጥር 85) አንቀጽ 4 ሥር የደመወዝ ክፍያ በመደበኛነት ሊከፈል እንደሚገባና በተለይም ደመወዛቸው በየወሩ ወይም በዓመት ተወስኖ ለተቀጠሩ ሠራተኞች ቢያንስ በወር አንድ ጊዜ የደመወዝ ክፍያ ሊፈጸም እንደሚገባ ይደነግጋሉ።
ይህ መብት በሀገራዊ ሕጎች ዕውቅና ያገኘ እና በፌዴራል የመንግሥት ሠራተኞች አዋጅ ቁጥር 1064/2017 እና በደቡብ ክልል የመንግሥት ሠራተኞች አዋጅ ቁጥር 175/2011 ጭምርም የተደነገገ ቢሆንም በአከባቢው በተቃራኒው ተግባራዊ እየተደረገ ይገኛል። #Ethiopia #Wolaita
በጋዜጠኛ ናትናኤል ጌቾ የተጠናቀረ ዘገባ ነው