
በጋዜጠኛ ናትናኤል ጌቾ የተጠናቀረ ዘገባ
የዎላይታ ታይምስ ሚዲያ ይሄንን ምርመራ ዘገባ ለመስራት፦ ከህብረተሰቡ በተለይም ከተቋሙ ሰራተኞች፣ ማህበሩን በቅርበት ከሚከታተሉት እንዲሁም ከማህበሩ ጋር በተለያዩ ጉዳዮች በጋራ እየሰሩ ከሚገኙ መንግስታዊ ያልሆኑ ድርጅቶች ሰራተኞች እና አመራሮች ያሰባሰበውን መረጃና ማስረጃ መነሻ በማድረግ እንደሆነ በቅድሚያ ለመጠቆም እንወዳለን።
በሌላ በኩል የተገኙ መረጃዎችን በሙሉ በዘፈቀደ እዚሁ ዘገባ ላይ አላቀረብንም። ምክንያቱም ምናልባት መረጃዎቹ ይፋ ከተደረጉ የማህበሩ ህልውናውን ይጎዳሉ ወይንም የህግ ተጠያቂነት ቀጥሎ የሚኖር ከሆነ ሂደቱን ያደናቅፋሉ ያልናቸውን ጥብቅ መረጃዎችን አላቀረብንም።
የዎላይታ ልማት ማህበሩ ከቀደምት አመራሮችና የልማት ስራዎች ብሎም በጎ ተጽእኖ ፈጣርነቱ፣ አለኝታነቱ እና ከአውራነቱ ቁልቁል ተፈጥፍጦ በዘረፋ፣ በስርቆት፣ በዘረኝነት፣ በብልሹ ስነምግበር እና ከህዝብ ጥቅም ይልቅ ግለኝነት የነገሰበት ተቋም እየሆነ ስለመምጣቱ ጥቂት ማሳያዎችን እንደሚከተለው በዝርዝር እናቀርባለን።

ላለፉት አራት አመታት በአንጻራዊነት ከቀደሙት የልማት ማህበሩ ተግባራትና ውጤት አንጻር ስታይ ይህ ነው የሚባል በየወረዳዎች የሚተገበሩ የልማት ስራ ካለመሰራቱም በላይ የህዝብን አጀንዳ ማስቀየርያነት መጠቀምያ ተቋም እየሆነ መጥቷል።
በሰው ሀይል አደረጃጀት በሰፈርና በጎሳ የተጠላለፈ ከመሆኑም ባሻገር በቅጥርና ዝውውር ላይ በሚደረጉ የጎሉ አድላዊ አሰራሮች ሰራተኞች የስራ ሞራላቸው በከፍተኛ ደረጃ ከመውደቁ ባሻገር ለስራ ትኩረታቸው እጅግ የቀነሰ ሆኖ ተመዝግቧል፡፡
ከጥቂት አመታት ወዲህ የማህበሩ ማኔጅመንት አባላት ስራ ተኮር የስራ ግምገማ የማያደርጉና በውስጣቸው በጎራዎች/ቡድኖች ተከፋፍለው ከመናቆር ያለፈ በክልሉ ውስጥ አውራ ልማት ማህበርነቱን አስቀጥሎ የመሄድ ጉዳይ የተዘነጋ መሆኑ አሳይተዋል።
በጎራ ለመከፋፈላቸው የአንበሳውን ድርሻ የሚወስዱት ዋና ስራ አስፈጻሚው ከችሎታ በታች በሆነ የስራ እና ተቋም አመራር ዘይቤ መያዛቸውና በመከተላቸው በተጨማሪ በግል ጥቅም ላይ ብቻ ያተኮሩ በመሆናቸው ማህበሩ ደካማ ውጤት እያስመዘገበ ይገኛል፡፡
በመሆኑም አድስ ከሚመጡ ስራ አስፈጻሚዎች ላይ መለጠፍን ዋና ተግባር በማድረግ የህዝቡንና የማህበሩን ተግባር በመዘንጋት ልማት ማህበሩን የቁልቁለት ጉዞ እንዲያፋጥን ያደረጉት በስራቸው ያሉ ም/ሥራ አስፈጻሚዎች መሆናቸው የማህበሩ ሰራተኞች ተጠያቂ ስያደርጉ ይታያሉ።
በልማት ማህበሩ ስር ከተደራጁ ተቋማት ውስጥ ዳሞታ ኮንስትራክሽን ስሆን በተለያዩ ቦታዎች በግንባታ ሳይቶችና ፑንዱንያ ከሚገኙ ግምጃ ቤቶች በሚልዮን ገንዘብ የሚገመቱ የተለያዩ ማሽኖች፣ የማሽን አካላቶች፣ ብረቶች ወዘተ በተደጋጋሚ ዝርፊያ የተካሄደባቸው ሲሆን ድርጊቱ ከውስጥና ከውጭ በተባበሩት ሌቦች ተፈፅሟል።
ከመሆኑም በላይ በሶዶ ከተማ ፖሊስ ስመረመር ቆይቶ ምክንያቱ በውል ባልታወቀበት መቋረጡ ለዘራፊዎች በጎ አጋጣሚ የፈጠረ በመሆኑ ቀጥለውም በተደጋጋም የህዝብ ሀብትና ንብረት በማባከንና ለግለሰቦች መበልጸጊያነተ እየዋለ ይገኛል፡፡
በሁምቦ ወረዳ በሀሚፖ ኮይሻ ቀበሌ የልማት ማህበሩ በግብርና ሰርቶ ማሳያነት በሚያገለግል ስፍራ የተለያዩ ስራስሮች፣ የማር፣ አትክልት፣ አዝርት፣ እንስታትና የእንስሳት ተዋጽኦዎችን የሚያመርት ሲሆን ጥቂት ከሚባሉት ውጭ ምርቶቻቸው አድራሸቸው የት እንደሚገቡ የማኔጅመንት አባላት ጭምር የማያውቃቸው ከመሆኑም በዘለለ ለአንዳንድ የመንግስት ሹመኞችን እንደእጅ መንሻነት እንደሚበረከቱ እና ለግል ጥቅም እንደሚውሉ ጭምር መስማታቸውን ያጋራሉ፡፡
ከዚህም አልፎ ተርፎ ስራ አስፈጻሚው አላማው በግልጽ በማይታወቅ ሁኔታ የተደራረቡ የውሎ አበሎችና ጥያቀ ውስጥ ሊያስገቡ የሚችሉ የነዳጅ አጠቃቀም ሂደታቸው ጥቅም ተኮር ስለመሆናቸው ያመላከተ ሆኖ ታይቷል፡፡
እጅግ የሚያሳዝን ሆኖ የተገኘው ደግሞ ከልማት ማህበሩ ጋር የስራ እና የተግባር ግንኙነት የሌላቸው ግለሰቦች በትውውቅና ቤተሰባዊ በሆኑ ግንኙነቶች አበሎችንና ልዩ ልዩ ጥቅሞችን መጋራታቸው መሆኑን ከምርመራ ሰነዶች ለማረጋገጥ ችለናል፡፡
በተመሳሳይ በአበላ አባያ ወረዳ የሚገኘውን የቀድሞ የመንግስት እርሻ ማህበሩ በመረከብ እየሰራበት እንደሚገኝ በተለያዩ ማህበራዊ ሚዲያዎች ያየን ስሆን ለማጣራት ባደረግነው ጥረት አግባቢነት ያላቸው የገቢና ወጭ ቁጥጥሮች በምርትም ላይ ይሁን በገንዘብ እንደማይካሄድና ከጥቂት ግለሰቦች ውጭ ስለጉዳዩ ማናቸውም ሰራተኞችም ይሁን ማነጅመንቱ ግንዛበ እንደለላቸው ይናገራሉ፡፡
ሥራ አስፈጻሚዎች የተገለገሉበት የመስተንግዶ ክፊያ ብር 3.5 ሚልዮን በላይ እንዲከፈል ከጉተራ ስልጠና ማዕከል ለዋና ጽ/ቤት በደብዳቤ የተጠየቀና ክፊያው በገንዘብና በተለያዩ እዳዎች የተሸፈነ መሆኑን የተረዳን ሲሆን ማህበሩ ከቀደመ የማህበሩ የቆጣቢነትና አግባቦችን መከተል ባህል እጅግ ያፈነገጠ መሆኑን ያሳያል፡፡
ልማት ማህበሩ የልማት ስራዎችን የሚሰራው ከአባላቱ በሚሰበስበው የአባልነት መዋጮ እና ካቋቋማቸው የንግድ ተቋማት እንደሆነ የሚታወቅ ቢሆንም ማህበሩ አዳዲስ አባላትን በማደራጀት የጎላ ሥራዎችን መስራት ስገባው በዞኑ ውስጥ ካሉ ወረዳዎች በትንሹ ከአንድ አመት እስከ 34 ወራት ያልሰበሰባቸው ከ 20 ሚልዮን ብር በላይ እንዳለ በማስረጃ ጭምር ስቀመጥ ይታያል፡፡
በመሆኑም በቀደሙት ጊዜያት ከሚሰበሰቡ ገንዘቦች እያንዳንዱ ቅርንጫፍ ጽ/ቤ ወረዳዎች እኩለታውን ከልማት ማህበሩ ጋር በመሆን በማቀድ ለወረዳቸው የተለያዩ ግንባታዎችን መስራታቸው የሚታወስ ሲሆን ላለፉት አራት አመታት ግን ምንም አይነት ስራ ያልተሰራ መሆኑን ለማወቅ ተችሏል፡፡
በልማት ማህበሩ የተቋቋሙ አዳዲስ ተቋማት በበቂ ጥናትና ትኩረት ባለመደራጀታቸው የተነሳ ላልተፈለገ ወጭ እና ኪሳራ በተደጋጋሚ በመዳረጋቸው እንዲታጠፉ በሚመለከታቸው ሀሳብ ቢሰጥም በቸልተኝነት በመያዝ ከቀን ወደ ቀን ማህበሩን እነደማህበር ዋጋ እያስከፈሉ ይገኛሉ፡፡
ዎላይታ ሊቃ ትምህርት ቤት የዎላይታ ኩራት የሆነ ተቋም ሲሆን ከቅርብ ጊዜ ወዲህ የትምህርት ቤቱን መርህና ደንብ በጣሰ መልኩ የተማሪዎችን ቅበላ የሚያደርግ፣ የትምህርት ቤቱ አመራሮች በማያውቋቸው አማካኝነት በተጽእኖ እንዲቀላቀሉ የሚደረጉ ተማሪዎች መኖራቸው የተፈለገውን ያህል ውጤት እንዳያመጡ ከማድረጉም ባሻገር ለቀጣይ የአሰራር ክፊተትን እንደሚፈጥር በቅርቡ በድንገት ውጤትን አስመልክቶ ለመገምገም ለሞከሩት ስራ አስፈጻሚ የት/ቤቱ ኃላፊዎች በአስተያየት መልኩ ተናግሯቸው እነደነበር መረጃዎች ያሳያሉ፡፡
በተመሳሳይ ባለፉት ጊዜያት ልማት ማህበሩ ከተለያዩ ግብረሰናይ ድርጅቶች ጋር የሁለትዮሽ ስምምነት በመፈጸም በጤና፣ እርሻ፣ ትምህርት እና አካል ጉዳተኞች ላይ ከ 10 ከሚበልጡ ድርጅቶች ጋር ስሰራ የቆየ ቢሆንም በአሁን ወቅት ሁለት የአጭር ጊዜ ፕሮጀክቶችን ብቻ ይዞ መገኘቱ የዞኑን ህዝብ በአያለው ከመጉዳቱ ባለፈ የልማት ማህበሩን አሁናዊ አፈጻጸሚ ቆም ተብሎ እንዲገመገም የሚያስገድድ እንደሆነ አመላካች ወሳኝ ወቅት ላይ እንደምንገኝ የሚጠቁመን እንደሆነ ማነጅመንቱም ሆነ ሰራተኛው ስያነሱ ይስተዋላል፡፡
ከላይ በተጠቀሱትና ባልተጠቀሱት ምክንያቶች ማህበሩ እጅግ ደካማ የሚባል አፈጻጸም በማስመዝገቡ ከግብረሰናይ ፕሮጀክቶች፣ ከራሱ የንግድ ተቋማት፣ ከቅርንጫፍ ጽ/ቤት ድርሻ የሂሳብ አካውንቶች በሚልዮኖች የሚቆጠር ባለእዳ ሲሆን በወቅቱ ለሰራተኞች ደሞዝ መክፈል ወደ ማይችልበት ደረጃ የደረሰና ለተለያዩ አገልግሎት ሰጪ ተቋማት መክፈል የሚገባቸውን ገንዘቦች አቅም እያጠረው መሆኑ በሰፊው ይነገራል፡፡
የልማት ማህበሩ አካል የሆነው የዎልማ ጋራዥ ምንም እንኳን አጀማመሩ ለዞኑም ሆነ ለክልሉ መልካም ቢሆንም እንደቀደሙት ተቋማት ጥልቅ ግሚገማዎች ባልተደረጉበት የተከፈተ በመሆኑ አሁናዊ አፈጻጸሙ የሚጠበቀውን ያህል ሳይሆን ቀርቷል፡፡
ለአፈጻጸም ድክመቱ የልማት ማህበሩ በገንዘብ፣ በተሸከሪካሪዎች አካላት፣ በሰው ሀይል፣ በክህሎት… የመደገፍ ውስንነት ቢሆንም የተለያዩ አካላት ያስጠገናቸውን ተሸከሪካሪዎች ወጭ በወቅቱ ባለመክፈላቸው እና የቦርዱም ድጋፍ ባለመኖሩ ተቋሙ በተፈለገው ልክ ውጤታማ ሳይሆን ቀርቷል፡፡
በአጠቃላይ ልማት ማህበሩ ህዝቡ የሚጠብቀውን ያህል ካለመሆኑ ባሻገር ከጊዜ ወደ ጊዜ ከህዝቡ እይታና ልብ እየራቀ የመጣ ስለመሆኑ ብዙዎች የሚስማሙት እየሆነ መጥቷል፡፡
በመሆኑም በልማት ማህበሩ የሚሰሩ ሰራተኞችም ሆኑ የማነጅመንት አካላት በመቀራረብ እና በቁጭት እንዳይሰሩ የስራ ኃላፊዎች የክትትል እና ግምገማ እና ቁጥጥር አድራጊ ክፍሎችን በጥቅምና በማስፈራራት የእርምት እርምጃዎች እንዳይወሰዱ በማድረግ ስያዘናጓቸው ይስተዋላል፡፡
በማህበሩ የጋራ እቅድ አለማድረግ፣ መተግበርና ተግባርን መገምገም እንደ ታርክ ማንሳት ከተጀመረ ረጅም ጊዜ አስቆጥሯል፡፡በተጨማሪም ከባለድርሻ አካላት ጋር የጋራ የስራ ውይይት እና ከህዝቡ ጋር ጭምር ምክክር ባለመደረጉ ክስተቶች እየሰፉና ውድቀት እየተፋጠነ መሆኑ ተመልክቷል፡፡
ዎላይታ ልማት ማህበር (ዎልማ) የዎላይታ ሕዝብ ብቸኛ የልማት አለኝታ ነበር፣ ነዉ። የዎላይታ ሕዝብ የረጅም ዘመናት ታሪክ ባለቤት ቢሆንም የዘላቂ ልማት ፍላጎቱን የሚደግፍ ባንክ፣ ኢንሹራንስ፣ የልማት ኮርፖሬሽን፣ ሁነኛ የቁጠባና ብድር ተቋም ወዘተ የለዉም።
በዎልማ ወርቃማ ዘመናት የነበረዉ የብሔሩን ምሁራን በማህበሩ አጠቃላይ ሁኔታዎች የማወያየት ገንቢ አስተያየቶችንና ምክሮችን የመቀበል አሰራር ሊዘረጋ እንደሚገባ በርካቶች ይስማሙበታል።
በመሆኑም ጊዜ ሳይወሰድ ስለ ጉዳዩ ያገባኛል/ይመለከተኛል የሚል አካል የማህበሩን አሁናዊ አቋም በቅርበት ሊከታተለውና እርምት እርማጃ ሊወስድበት እንዲሁም የማህበሩን ህልውና የማዳን ተግባር መስራት እንደማገባ ልናሳስብ እንወዳለን።

ማሳሰቢያ፦ የዎላይታ ታይምስ ሚዲያ ይሄንን ምርመራ ዘገባ ለመስራት፦ ከህብረተሰቡ በተለይም ከተቋሙ ሰራተኞች፣ ማህበሩን በቅርበት ከሚከታተሉት እንዲሁም ከማህበሩ ጋር በተለያዩ ጉዳዮች በጋራ እየሰሩ ከሚገኙ መንግስታዊ ያልሆኑ ድርጅቶች ሰራተኞች እና አመራሮች ያሰባሰበውን መረጃና ማስረጃ መነሻ በማድረግ እንደሆነ በቅድሚያ ለመጠቆም እንወዳለን።
በሌላ በኩል የተገኙ መረጃዎችን በሙሉ በዘፈቀደ እዚሁ ዘገባ ላይ አላቀረብንም። ምክንያቱም ምናልባት መረጃዎቹ ይፋ ከተደረጉ የማህበሩ ህልውናውን ይጎዳሉ ወይንም የህግ ተጠያቂነት ቀጥሎ የሚኖር ከሆነ ሂደቱን ያደናቅፋሉ ያልናቸውን ጥብቅ መረጃዎችን አለማቅረባችንን በድጋሚ እንገልፃለን።
👉🤝 እውነት፣ ሀቅ፣ ፍትህ፣ ግልፅነት፣ ሰብዓዊነት፣ ቅንነትና ሚዛናዊነት የሚንፀባረቅበት መረጃዎች🙌
👉🤝 ዘውትር በህብረተሰቡ ውስጥ ነን🙏
👉🤝 ስለዘውትር አብሮነታችሁና ድጋፍ እናመሰግናለን🤲
🤜👁👀 #WolaitaTimes ሚዲያ👏
Ethiopia #southethiopia #WODA #ዎልማ
በጋዜጠኛ ናትናኤል ጌቾ የተጠናቀረ ዘገባ