1000031496

ላለፉት ሁለት ቀናት በደቡብ ኢትዮጵያ ክልል ፖለቲካ ብልሽት ዙሪያ ሲካሄድ የቆየው ጥልቅ ግምገማ ማምሻውን ተጠናቀቀ

መድረኩ የተዘጋጀው “ህዝብን ማገልገል ትተው በግሮሴሪና እና አልጋ ቤት” ውሏቸውን ያደረጉ የደቡብ ኢትዮጵያ ክልል አመራሮች በሚገባ ተገምግሞ እንዲቀርብ ተብለው ጠቅላይ ሚኒስትር በሰጡት አቅጣጫ መሠረት እንደሆነ የደረሰን መረጃ ያመለክታል።

መድረኩን የመሩት ምክትል ጠቅላይ ሚኒስትር እና የገዥው ፓርቲ ም/ፕረዝዳንትና የዋና ጽ/ቤት ኃላፊ አቶ አደም ፋራህ ሲሆኑ ሚኒስተሮች፣ በፌደራል በክልል ደረጃ ከፍተኛ ኃላፊነት ያላቸው የክልሉ ተወላጅ አመራሮች በተገኙበት በዎላይታ ሶዶ ከተማ ጉተራ አዳራሽ ተካሂዷል።

በዋናነት ስር በሰደደው ሙስና፣ ስነምግባር ጉድለት፣ አድሏዊነት፣ ብልሹ አሰራር ዙሪያ የመፍትሔ አቅጣጫ ለማስቀመጥ ጥልቅ ግምገማ መድረክ ከፍተኛ ጥበቃ ተደርጎ መካሄዱን ከአንድ ተሰብሳቢ ለዎላይታ ታይምስ ሚዲያ የደረሰው መረጃ ያመለክታል።

በግምገማው በርካታ ጉዳዮች የተነሱ ሲሆን በተለይም የክልሉ ርዕሰ መስተዳድር በማንአለብኝነት በህገወጥ መንገድ ስለፈፀሙት አድሏዊነት፣ ሙስና፣ የአሰራር ጥሰት፣ ሰፈርተኝነትና ኢፍትሃዊነት በስፋት ተነስቷል።

በአብዛኞቹ ተሰብሳቢዎች በክልሉ የመንግስት አሰራር ሆነ የገዥው ፓርቲ ተግባርና ስልጣን በግለሰቦች እጅ በመውደቁ በየአካባቢው የመልካም አስተዳደር ጥያቄ ምላሽ እንዳይሰጥና ህብረተሰቡ በመንግሥት ላይ እምነት እንዳይጥል እንቅፋት በመሆን ከክልሉ ሆኗል በሚል ተገምግሟል።

በክልሉ አመራሮች መካከል በግልጽ የሙስና ተግባራቸው በመረጃና ማስረጃ ተደጎፎ የተነሳው ምክትል ርዕሰ መስተዳድር አቶ አክሊሉ አዳኝ ከአስተዳደራዊ እርምጃ ባሻገር በህግ እንዲጠይቁ አቅጣጫ ተቀምጧል።

በመድረኩ የክልሉ አመራሮች የህዝብን አደራ ወደ ጎን በመተው በብልሹ አሰራር ተሳትፈዋል ያላቸውን ርዕሰ መስተዳድር ጥላሁን ከበደ ላይ በርካቶች ጥፋት ውሰጥ ተዘፍቀው መኖሩን በማብራራት በፌደራል ደረጃ የተመደቡ የክልሉ ተወካዮች የወከላቸውን ህዝብ እንዳይገናኙ በማድረግ ክልሉ እንዳይረጋጋ ለማድረግ በእጅዙር የተለያዩ አጀንዳዎችን በመፍጠር ጥፋት ለመሸፈን ጥረት አድርጓል በሚል በመረጃ ከሷል።

የመድረክ መሪዎች በክልሉ ያለውን ከፍተኛ ብልሽት በተመለከተ የተነሱ ተጨባጭ መረጃዎችን በመውሰድ አስቸኳይ እርምት እርምጃ የሚያስፈልገው በመሆኑ በቦታው ምንም የውሳኔ ምላሽ ወይንም የማስተካከያ መመሪያም ሳይሰጡ ወደ ጠቅላይ ሚኒስትሩ ተመልሷል።

ነገር ግን ይሄንን የሀገሪቱ ምክትል ጠቅላይ ሚኒስትር ጨምረው በርካታ ከፍተኛ ባለስልጣናት የተሳተፉበት ትልቅ መድረክ በክልሉ ሆኑ በክልሉ ባሉ መዋቅሮች ሚዲያዎች ላይ እስካሁን አልተገለፀም።

👉🤝 እውነት፣ ሀቅ፣ ፍትህ፣ ግልፅነት፣ ሰብዓዊነት፣ ቅንነትና ሚዛናዊነት የሚንፀባረቅበት መረጃዎች🙌
👉🤝 ዘውትር በህብረተሰቡ ውስጥ ነን🙏
👉🤝 ስለዘውትር አብሮነታችሁና ድጋፍ እናመሰግናለን🤲
🤜👁👀 #WolaitaTimes ሚዲያ👏

Ethiopia #southethiopia #Wolaita