
በተለይ የኢትዮጵያ መንግስት በራሱ ዜጎች ላይ የሚያደርሰውን የድሮን ጥቃት በአስቸኳይ እንዲያቆም እና ሌሎች ውሳኔዎችን እንዲያመቻች የአሜሪካ አምባሳደር ኤርቪን ማሲንጋ አሳስበዋል።
ይህ ጥሪ የተሰነዘረው በኢትዮጵያ እየተባባሰ የመጣው ግጭት በዜጎች ላይ እያደረሰ ያለውን ሰፊ ጉዳት እና ስቃይ በማሰብ ሲሆን አምባሳደር ማሲንጋ በዛሬው ዕለት በሰጡት መግለጫ፣ ግጭቶች ለሌላ አመት ሲራዘሙ በሁሉም የኢትዮጵያ ህዝቦች ላይ የሚያደርሱት ተፅእኖ ከፍተኛ መሆኑን ገልፀዋል።
“ሰዎችን ማስቀደም” የሚል ጥሪ ያቀረቡት አምባሳደሩ፣ ለዚህም ዘላቂ መፍትሄዎችን መተግበር፣ የተፈናቀሉ ዜጎች ወደ ቤታቸው እንዲመለሱ ማስቻል፣ ህፃናት ትምህርታቸውን እንዲከታተሉ እና የጤና አገልግሎት እንዲያገኙ ማድረግ፣ እንዲሁም በትጥቅ ትግል የሚመጣውን ስርዓት አልበኝነት ማስቆም ወሳኝ መሆኑን አሳስበዋል።
አሜሪካ ለሁለቱም ለፋኖ እና ለኦሮሚያ ነፃነት ጦር (OLA) ግልጽ ጥሪ አቅርባለች። ፋኖ “በተጨባጭ እና ሰላማዊ ዓላማዎች እንዲመጣ” የተጠየቀ ሲሆን፣ የኦሮሞ ነፃነት ሰራዊት ደግሞ በኦሮሚያ ያለውን ጦርነት ለማስቆም “በድርድር እንዲቀጥል” ተጠይቋል።
ይህ ጥሪ የሚያሳየው አሜሪካ በሁሉም ወገኖች መካከል የሰላማዊ መፍትሄ አማራጮችን እንደምትደግፍ ነው።
አምባሳደሩ የፌደራል መንግስት “በራሱ ህዝብ ላይ የሚደርሰውን የሰው አልባ አውሮፕላኖች (ድሮኖች) ጥቃት በአፋጣኝ እንዲያቆም” ያቀረቡት ጥያቄ፣ የሰላማዊ ዜጎችን ደህንነት ለመጠበቅ እና የሰብአዊ መብት ጥሰቶችን ለማስቆም የአሜሪካን ቁርጠኝነት የሚያሳይ ነው።
አምባሳደር ማሲንጋ ንግግራቸውን ሲያጠቃልሉ “ሰላምን እና መረጋጋትን ለመከታተል ጊዜው አሁን ነው” ብለዋል።
ይህም አሜሪካ በኢትዮጵያ ዘላቂ ሰላም እና መረጋጋት እንዲሰፍን ያላትን ምኞት እና ለዚህም ድጋፍ ለመስጠት ያላትን ዝግጁነት ያመላክታል።