የዎላይታ ሕዝብ የዘመናት የልማት ጥያቄዎችና ያልተፈጸሙ ተስፋዎች የፈጠረው ተስፋ መቁረጥ👇
ከሕዝብ ለ WT ሚዲያ የደረሰው አስተያየት እንደሚያመለክተው፣ በክልሉ እየተባሉ የታቀዱ የልማት ፕሮጀክቶች መዘግየትና አለመተግበር ላይ ከፍተኛ ቅሬታ አቅርቧል።
አስተያየቱ ለማሳያነት ከቃል መሻገር ያልቻለ በተለይ በሱማሞ የአየር ማረፊያ፣ በዎላይታ ሶዶ ዓለም አቀፍ ስታዲየም እና በዎይቦ ግድብ ግንባታዎች ዙሪያ ትኩረት አድርጓል።
አስተያየቱ እንደሚያመለክተው፣ የሱማሞ አየር ማረፊያ ግንባታ አለመጀመሩን እና የዎላይታ ሶዶ ዓለም አቀፍ ስታዲየም ግንባታም እንዳልተጠናቀቀ ይገልጻል።
እነዚህ ፕሮጀክቶች ቀደም ባሉት ምርጫዎች ዋዜማ ላይ ሕዝቡን ለማታለል በ3D ዲዛይን መልክ ፕሮፓጋንዳ እንደተሰራባቸውና አሁን ደግሞ ሌላ ምርጫ በመድረሱ በድጋሚ ተመሳሳይ ፕሮፓጋንዳ እንደሚጠበቅ አስተያየቱ ያብራራል።
በተመሳሳይ፣ የዎይቦ ግድብ ግንባታ ሂደት የት እንደደረሰ ግልጽ አለመሆኑ እና በርካታ ጊዜያት የፕሮፓጋንዳ ርዕስ እንደነበርም ተጠቅሷል።
አስተያየቱ፣ በዎላይታ ሕዝብ ስም የተቀመጡ ኃላፊዎች ከራሳቸው ጥቅም ውጪ የሕዝብን ልማት እንደዘነጉ በማመልከት፣ የዎላይታ ሕዝብ የልማት ጥያቄዎችና መብቶቹ ተገቢውን ምላሽ እንዳላገኙ ይገልጻል።

የዎላይታ ሕዝብ ተግባር ወዳድ መሆኑንና ለልማት የሚገባው ቢሆንም፣ በነዚህ “ጥገኞችና አቅመ ቢሶች” እየተጎዳ መሆኑን አስተያየቱ አጽንኦት ሰጥቷል።
የዎላይታ ሕዝብ ከ6 በላይ ብሔራዊ ደረጃቸውን የጠበቁ የስፖርት ክለቦችን (የእግር ኳስና የመረብ ኳስ) በየደረጃው እያሳተፈ የሚገኝ በመሆኑ፣ ከማንም በፊት ዓለም አቀፍ ስታዲየም እንደሚገባው አስተያየቱ ያብራራል፡፡
ይሁን እንጂ፣ አሁን ባለው አመራር መቼ ሊከናወን እንደሚችል ጥያቄ አቅርቧል፡፡
አስተያየቱ የቀድሞ መሪዎች የነበራቸውን የልማት ቁርጠኝነት በማስታወስ፣ በአማኑኤል እቶሮ መሪነት ዘመን ፍሬው አልታዬ ባስጀመሩት ሥራ በዎላይታ ሶዶ በአስፋልት እንደለበሰችና እንደለማች በመጥቀስ፣ ዛሬ ግን የሚታመንና ለሕዝቡ ልማት የሚጨነቅ ሐቀኛ አመራር እንደጠፋ ስሜት እንዳለ ይገልጻል።
በተለይም፣ በዎላይታ የማኑፋክቸሪንግ ኢንዱስትሪ ልማት እንዲፈነጥቅ፣ በመቶ ሺዎች ለሚቆጠሩ ሥራ አጦች ሥራ ዕድል እንዲፈጠር የሚያስብ አመራር አለመኖሩ በተደጋጋሚ እየታየ መሆኑን አስምሮበታል።
በቅርቡ ኪንዶ ላይ የሃይሌ ሪዞርት ግንባታ መጀመሩ የሚያስመሰግን ቢሆንም፣ አስተያየቱ አሁን ባሉት የመንግስት ኃላፊነት ላይ ያሉ የዎላይታ ተወካዮች ለምን የኢንዱስትሪ ፓርክ ፕሮጀክት ወደ ወላይታ አያመጡም? የሚል ጥያቄ አቅርቧል፡፡
በመጨረሻም፣ የዎላይታ ሕዝብ ትርጉም ያለው፣ በሺዎች የሚቆጠሩ ሰዎችን የሚቀጥር ኢንዱስትሪ እንደሚፈልግ፣ የ50 ሜትር መንገድ ንጣፍ ወይም የእንጨት ቀለም መቀባት ልማት ተደርጎ ሊወሰድ እንደማይገባው ገልጿል።
ወጣቱ የኢንዱስትሪ ፓርክ፣ የአግሮ ፕሮሰሲንግ ኢንዱስትሪ እና ደረጃውን የጠበቀ ስታዲየም እንደሚሻ አስተያየቱ አጽንኦት ሰጥቷል።
የሕዝቡ የሰለቸውን ፕሮፓጋንዳ ሳይሆን ተግባራዊ ልማትን እንደሚሻ በግልጽ አስቀምጧል። #Ethiopia #southethiopia #Wolaita