GridArt_20251115_175748282

በመቶዎች የሚቆጠሩ ሠራተኞች የደመወዝ ጭማሪ ተከለከሉ! በወር 1,100 ብር የሚሠራ የመንግሥት ሠራተኛ ያለው ብቸኛ ከተማ!

በደቡብ ኢትዮጵያ ክልል በዎላይታ ሶዶ ከተማ አስተዳደር ሥር የሚገኙ በመቶዎች የሚቆጠሩ የኮንትራት ሠራተኞች ሕገ መንግሥታዊ የመብት ጥሰት እየደረሰባቸው መሆኑን WT Media ከቀጥተኛ የቅሬታ መረጃ አረጋግጧል።

በከተማ አስተዳደሩ ውስጥ ከ500 ያላነሱ የኮንትራት ሠራተኞች የአምናው የኑሮ ውድነት ማቅለያ ድጎማ ሳያገኙ፣ የዘንድሮው (ከመስከረም 2018 ዓ.ም. ጀምሮ የተጀመረው) የደመወዝ ጭማሪ ደግሞ ለቋሚ ሠራተኛ ብቻ ተከፍሎ ተገኝቷል።

በአሁኑ ወቅት የኮንትራት ሠራተኞቹ በወር 1,100 ብር ደመወዝ እየተከፈላቸው ሲሆን፣ ይህ አሳዛኝ ሁኔታ “በአጠቃላይ በኢትዮጵያ ውስጥ” በዎላይታ ሶዶ ከተማ ብቻ እንደሚገኝ ቅሬታ አቅራቢዎቹ ገልጸዋል።

የአምናውንም ሆነ የዘንድሮውን ጭማሪ ሳያገኙ በመቅረታቸው “ለከፋ የኑሮ ውድነትና የመኖር ያለመኖር ሕልውና ጥያቄ” ውስጥ ወድቀናል።

ከእነዚህ ሠራተኞች መካከል መንገድ የሚጠርጉ እናቶች፣ በማዘጋጃ ቤት ከ10 ዓመት በላይ ያገለገሉ የጽዳት ሠራተኞች ይገኙበታል፤ እነኚህም ሠራተኞች የጡረታና ማንኛውንም የመንግሥት መዋጮ የሚቆረጥባቸው ናቸው።

የሲቪል ሰርቪስ ኮሚሽን ያወጣው “የመንግሥት መሥሪያ ቤቶች የደመወዝ ስኬል ማሻሻያ አፈጻጸም መመሪያ ቁጥር 1110/2018” በግልጽ የኮንትራት ሠራተኞችን እንደሚመለከት አስቀምጧል።

መመሪያው ክፍል 3፣ ንኡስ አንቀጽ 9 ላይ በግልጽ እንደተቀመጠው፦ “ይህ የደመወዝ ስኬል ማሻሻያ ጊዜያዊ ወይም የኮንትራት ወይም የፕሮጀክት ሠራተኞችን ይመለከታል” ይላል።

“ከላይ የሚመጣው መመሪያ እየፈቀደ የኛዎቹ [የአካባቢው አመራሮች] እኛን ለልመና እያደረጉን ይገኛሉ” ሲሉ ቅሬታቸውን አሰምተዋል።

ሕጉና ደንቡ በግልጽ የተቀመጠ ቢሆንም፣ በዎላይታ ሶዶ ከተማ አስተዳደር የሕግ የበላይነት ተጥሶ በመቶዎች የሚቆጠሩ ዜጎች ያለአግባብ በኑሮ ውድነት እንዲሰቃዩ መደረጉን የቅሬታው መረጃ ያመለክታል።

WT Media ይህንን ሕገወጥ አሠራር የክልሉና የፌዴራል መንግሥት አመራሮች ትኩረት እንዲሰጡበት ጥሪ ያቀርባል።

ማሳሰቢያ፦ #WTMedia በሀገሪቱ በተለይም ደቡብ ኢትዮጵያ አከባቢ በመንግሥት ሚዲያዎች ትኩረት በማያገኙ ለተጮቆኑ ህብረተሰብ ክፍሎች ጉዳይ የቅድሚያ ቅድሚያ ሰጥተው እውነትንና ሀቅን መሠረት አድርገው የሚሰራ ስለሆነ የመረጃ ሰጪ ግለሰቦች ምስጥርና ደህንነት በተጠበቀ ሁኔታ የደረሱን መረጃዎችን መልሰን አጣርተን ለህዝብና የሚመለከታቸው አካላት ትኩረት እንዲሰጡበት በታማኝነት ይፋ እናደርጋለን።

ለማህበረሰቡ ከፍተኛ ፋይዳ ባላቸው ህዝብ ጉዳዮች ላይ ሀሳባችሁን ለማካፈል ለሚፈልጉ ሁሉ ዘውትር በህብረተሰቡ ውስጥ ሆነን እውነት፣ ሀቅ፣ ፍትህ፣ ግልፅነት፣ ሰብዓዊነት፣ ቅንነትና ሚዛናዊነት የሚፀባረቅበት በሌሎች ትላልቅ ሚዲያዎች የማይሰሙ የጭቁኖች ድምፅ ዘውትር እዚሁ ይሰማልና ስለ ዘውትር አብሮነታችሁ ምስጋናችን የላቀ ነው!! እኛ ዘውትር የእናንተው የጭቁኖች አገልጋይ ነን !!
Voice of Marginalized Community – WT Media

R