GridArt_20251118_190303229

የ WT Media ልዩ ዝግጅት

የዎላይታ እና ዳውሮ ህዝብ፦ የደቡብ ኢትዮጵያ እና የደቡብ ምዕራብ ኢትዮጵያ ክልሎች ሕዝቦች በአሁኑ ወቅት የጋራና አንገብጋቢ የሆኑ አንድ የልማት ጥያቄ አንስተዋል፤ ይኸውም የጊቤ (ኡማ ወንዝ) ላይ የተገነባውን ኤሌክትሪክ ማመንጫ ግድብ ምክንያት በተፈጠረው በጊቤ (ኡማ) ሶስት ሰዉ ሰራሽ ሐይቅ ላይ አዲስ “ድልድይ ይገንባልን” የሚል ነው።

ይህ ጥያቄ የሁለቱን ክልሎች ሕዝቦች የማኅበራዊና ኢኮኖሚ ትስስር እጣ ፈንታ የሚወስን መሆኑን WT Media በሰራው ልዩ ዝግጅት አረጋግጧል።

  1. የድልድይ ልማት እና ዘመናዊው ዓለም

የታሪክ መዛግብት የድልድይ ግንባታ ሥራ ከጥንት ጀምሮ የሰውን ልጅ ሥልጣኔ ሲገልጽ መኖሩን ሲያወሱ፣ በዘመናዊው ዓለም ደግሞ እንደ ጊቤ 3 ያሉ ሰዉ ሰራሽ ሐይቆችን ለመሻገር የሚገነቡ ግድቦች Suspension Bridges መሆናቸውን የምህንድስና ጥበብ ያሳያል።

ዓለምአቀፍ ተሞክሮ:

ቱርክ ውስጥ ከ2 ኪሎ ሜትር በላይ ውሃ አሻጋሪ ድልድይ ተገንብቶ አገልግሎት እየሰጠ ሲሆን፣ በጃፓን እና ቻይናም ተቀራራቢ ሥራዎች አሉ።

የጊቤ 3 ዕድል:

የጊቤ 3 ሰው ሰራሽ ሐይቅ ነባሩን ድልድይ በመዋጡ መንገዱን በከፍተኛ ደረጃ ቢያረዝመውም፣ ከዓለምአቀፍ ተሞክሮ በተሻለ ባነሰ ቦታ ማቋረጫ ድልድይ የመገንባት ዕድል እንዳለ ጥናት መደረግ እንዳለበት ቢታወቅም፣ ነገሩ ግን ዕድሎች ያሉት መሆኑ አያጠራጥርም።

  1. የሕዝቡ የዕለት ተዕለት ስቃይ

WT Media ያነጋገራቸው የሕብረተሰብ ክፍሎች ድልድዩ በመጥፋቱ የመጣውን የኑሮ መስተጓጎል ገልጸዋል፦

የዳውሮ ተወላጅ አስተያየት: በአዲስ አበባ የሚኖሩ አንድ የዳውሮ ተወላጅ እንደገለጹት፣ ጊቤ 3 ከመገንባቱ በፊት ከታርጫ፣ ገሳ አልያም ዋካ የሚነሳ ተጓዥ ዎላይታ ሶዶ የጠዋት እንቅስቃሴዋን ስትጀምር ከተማዋ ይደርስ ነበር።

ከባድ መጓተት: “አሁን ላይ በተለይ በመደበኛ ሕዝብ ትራንስፖርት ይሄ አይታሰብም።” “በግሌ ችግሩን የዳውሮ ሕዝብ ለኢትዮጵያ ልማት የከፈለው መስዋዕትነት ነው ብዬ እወስደዋለሁ” የሚሉት አስተያየት ሰጪያችን፣ “ፈጣሪ ያንን ተሰርቶ ለማየት ያብቃን” ብለዋል።

የዎላይታ ሶዶ ነዋሪ አስተያየት:

በንግድ ሥራዋ ምክንያት በየጊዜው ወደ ዳውሮ የምትመላለስ አንድ የዎላይታ ሶዶ ነዋሪ፣ ድልድዩ “በጣም አስፈላጊና በተለይ ወንድማማቹን የዳውሮንና የዎላይታን ሕዝብ እጅግ የሚጠቅም ነው” ብለዋል።

“ለኔ እና ለመሰሎቻችን ድካምና ወጪ በመቀነስ ትልቅ አስተዋጽኦ ያበረክታል” ያሉት አስተያየት ሰጪዋ፣ የደቡብ ምዕራብ ኢትዮጵያ ክልል ሲመሠረት ወደ ሐዋሳ ቢሮዎች የሚደረገው ጉዞ የአካባቢውን በጀት ይጨርሳል የሚለው መከራከሪያ ይሄ ድልድይ አሁንም ቢሠራ ትልቅ እፎይታ እንደሆነ አክለዋል።

  1. የድልድዩ ኢኮኖሚያዊ ፋይዳ (ከምሁሩ እይታ)

የዎላይታና የዳውሮ አካባቢን በሥራ ምክንያት እንደሚያውቁ የገለጹ ምሁር በበኩላቸው፣ የድልድዩን ግንባታ “እጅግ ግሩም ሐሳብ ነው” ሲሉ አድንቀውታል፦

የክልሎች ማስተሳሰር: ድልድዩ ከተገነባ የሚያገናኘው የዎላይታንና የዳውሮን ሕዝብ ብቻ ሳይሆን የደቡብ ኢትዮጵያንና የደቡብ ምዕራብ ኢትዮጵያን ክልል ሕዝቦችን የሚያገናኝ ወሳኝ መሠረተ ልማት ይሆናል።

የሀገር ልማት እና ካሳ: ምሁሩ፣ ኢትዮጵያ ከጊቤ 3 የኃይል ማመንጫ ከጎረቤት አገራት ወደ 1 ቢሊዮን ዶላር የሚጠጋ ገቢ በየአመቱ እያገኘች መሆኑን ለ WT Media ጠቅሰው፣ ለሀገር ልማት የተጎዳውን ሕዝብ ድልድይ ገንብቶ መካስ እንደሚገባ አመላክተዋል።

የሀገር ግንባታ: “ይሄ ተራ የመንገድ ወይንም የድልድይ ግንባታ ሳይሆን የሀገር ግንባታ ነው” ያሉት ምሁሩ፣ ድልድዩ ደቡብ ኢትዮጵያን ከደቡብ ምዕራብ ኢትዮጵያ እስከ ጅማ በማስተሳሰር ከፍተኛ የኢኮኖሚ ጠቀሜታ እንደሚሰጥ በWT Media 🎙️ የሕዝብ ድምፅ ልዩ ዝግጅት ላይ አሳስበዋል።

🎙️ ማሳሰቢያ፦ WT Media በተለይ በደቡብ ኢትዮጵያ ክልል፣ በመንግሥት ሚዲያዎች ትኩረት ያላገኙ ለተጨቆኑ የሕብረተሰብ ክፍሎች ጉዳይ የቅድሚያ ቅድሚያ የምንሰጥ ሲሆን እውነትን፣ ሀቅንና ፍትሕን መሠረት በማድረግ፣ የመረጃ ሰጪዎችን ምስጢርና ደኅንነት በመጠበቅ በሌሎች ሚዲያዎች የማይሰሙ የጭቁኖች ድምፅ ዘውትር እዚሁ ይሰማልና ስለአብሮነታችሁ ምስጋናችን የላቀ ነው! የእናንተው የጭቁኖች አገልጋይ ነን🙏

Voice of Marginalized Community – WT Media