WhatsApp Image 2025-12-27 at 8.51.28 PM

ፍትሕ ለወጣት ባለሀብቱ ብርሃነመስቀል! አምስት ወራት የሞላው የግፍ እስርና የፍትሕ አደባባይ መከራ

በደቡብ ኢትዮጵያ ክልል ታዋቂና ለበርካታ ወጣቶች አርዓያ የሆነው የ34 ዓመቱ ወጣት ባለሀብት ኢንጂነር ብርሃነመስቀል ክንፌ፣ በተቀነባበረ የፈጠራ ክስ ታፍኖ ከታሰረ ዛሬ አምስት ወር ለመሙላት አራት ቀናት ብቻ ቀርተውታል።

ባለሀብቱ በክልሉ በተደራጁና ሥልጣንን ለግል ጥቅማቸው በሚያውሉ አካላት አማካኝነት ሰብዓዊና ዲሞክራሲያዊ መብቱ ተረግጦ፣ ያለ ፍትሕ በየማረሚያ ቤቱ እየተንገላታ ይገኛል።

1. ከሳውላ እስከ አርባ ምንጭ፤ የእስርና የእንግልት ጉዞ

ወጣት ኢንጂነር ብርሃነመስቀል መጀመሪያ በሳውላ ማረሚያ ቤት ታስሮ የነበረ ቢሆንም፣ በግፈኞች ትእዛዝ አሁን ወደ አርባ ምንጭ ማረሚያ ቤት ተወስዶ ይገኛል። ይህ ባለሀብት ለአምስት ወራት ያህል በእስር እንዲቆይ የተደረገባቸው ዋና ዋና ምክንያቶች፦

  • መብትን መጠየቅ፦ የራሱን መብት በፍትሕ አደባባይና በፍርድ ቤት ለማስከበር ሰላማዊ እንቅስቃሴ በማድረጉ ብቻ።
  • የፈጠራ ክስ፦ በሥልጣን ላይ ባሉ ግለሰቦች አማካኝነት የተደራጀ የፈጠራ ክስ ተመስርቶበት የዋስትና መብቱ እንዲከለከል ተደርጓል።
  • ኢንቨስትመንቱን ማደናቀፍ፦ ይህ የግፍ እስር የባለሀብቱን ሰፊ የኢንቨስትመንት ሥራዎች ያስተጓጎለ ሲሆን፣ ቤተሰቦቹንም ለከፍተኛ እንግልት ዳርጓል። 

የባለሀብቱ ባለቤት የሆነችው ወይዘሮ መክሊት ዳባራ እሱን ለመጠየቅ በሄደችበት ከህፃን ልጇ ጋር ባረፈችበት ሆቴል ድረስ የታጠቁ ኃይሎች በመምጣት በማስፈራራት ከፍተኛ የስነልቦና ጉዳት እና ሰብዓዊ መብት መጣሳቸውን WT Media በቪዲዮ መረጃ አስደግፈን ዘግበን ነበር። በተጨማሪም ባለሀብቱን ለመጠየቅ ወደ ማረሚያ ተቋም በሚሄዱ ሌሎች ቤተሰቦቻቸው ላይ ተመሳሳይ ጥቃት እየደረሰ ይገኛል።

2. የ WT Media የምርመራ ዘገባዎች ውጤት

WT Media በዚህ ወጣት ባለሀብት ዙሪያ ቀደም ሲል ባደረገው የምርመራ ዘገባ፣ የእስሩ መነሻ ከኢንቨስትመንት መሬትና ከጥቅም ግጭት ጋር የተያያዘ መሆኑን በሰነድና በማስረጃ አስደግፎ ማቅረቡ ይታወሳል። በክልሉ ያሉ ከፍተኛ ባለሥልጣናት የባለሀብቱን ሀብትና ንብረት ለመቀራመት እንዲሁም ድምፁን ለማጥፋት የፍትሕ ሥርዓቱን እንደ መሣሪያ እየተጠቀሙበት መሆኑን መረጃዎቻችን ያመለክታሉ።

3. “ፍትሕ የታሰረው ከባለሀብቱ ጋር ነው!”

ፍትሕ በአጋጣሚ ሥልጣን በያዙና በተደራጁ ቡድኖች እጅ መውደቋን የገለጹት የቅርብ ምንጮቻችን፣ ወጣቱ ባለሀብት የሕግ የበላይነት ባለበት አገር የዋስትና መብቱ ተከብሮ ጉዳዩን በውጭ ሆኖ እንዲከታተል ሊፈቀድለት ሲገባ፣ ሆን ተብሎ ከአንድ እስር ቤት ወደ ሌላ እስር ቤት እየተዛወረ እንዲሰቃይ መደረጉ አሳፋሪ መሆኑን ገልጸዋል።

 የ WT Media ጥሪ

እውነትን፣ ሀቅንና ፍትሕን መሠረት በማድረግ ለጭቁኖች ድምፅ የሚሆነው WT Media፣ አሁንም ደግመን ደጋግመን ለወጣት ባለሀብት ብርሃነመስቀል ፍትሕ እንዲሰጥ እንጠይቃለን!

  • የሚመለከታቸው የፌደራልና የክልል የፍትሕ አካላት ጉዳዩን በገለልተኛነት እንዲመረምሩ።
  • የባለሀብቱ ሰብዓዊ መብት ተከብሮ በአስቸኳይ ከእስር እንዲፈታ ጥሪያችንን እናቀርባለን።

🎙️ ማሳሰቢያ፦ WT Media በተለይ በደቡብ ኢትዮጵያ ክልል በመንግሥት ሚዲያዎች ትኩረት ያላገኙና የተጨቆኑ የኅብረተሰብ ክፍሎችን ጉዳይ ቅድሚያ ሰጥቶ ይዘግባል። የመረጃ ሰጪዎችን ምስጢርና ደኅንነት በመጠበቅ፣ በሌሎች ሚዲያዎች የማይሰሙ የጭቁኖች ድምፅ ዘወትር እዚሁ ይሰማል። ስለአብሮነታችሁ እናመሰግናለን!

የጭቁኖች ድምፅ — WT Media