በደቡብ ኢትዮጵያ ክልል በዎላይታ ዞን በሚገኘው አንጋፋው የሶዶ ፖሊ ቴክኒክ ኮሌጅ ውስጥ ለዓመታት ተቀብሮ የቆየው የሙስና መረብ፣ የአስተዳደር ብልሹነት እና የተቋማዊ ሀብት ምዝበራ አሳሳቢ ደረጃ ላይ መድረሱን ተከትሎ በተነሳው ውዝግብ ዙሪያ WT Media ሰፊ ምርመራ አድርጓል።

ከተቋሙ ሠራተኞች የደረሱን ሰነዶችና የምስል ማስረጃዎች እንዲሁም የኮሌጁ ዲን እንጂነር ያዕቆብ ያሲን ለቀረበላቸው ጥያቄ የሰጡት ዝርዝር ምላሽ እንደሚያሳዩት፣ ተቋሙ በሪፎርም ፈላጊዎችና በ”ጥቅም አደረጃጀት” በተሳሰሩ አካላት መካከል የጦር ግንባር ሆኗል።
1. የሠራተኞች አቤቱታ፦ “ኮሌጁ የስጋት ቀጠና ሆኗል”
ከኮሌጁ አሰልጣኝ መምህራንና የአስተዳደር ሠራተኞች የደረሰን አቤቱታ እንደሚያመለክተው፣ በተቋሙ ውስጥ ላለፉት ሦስት ተከታታይ ዓመታት ምንም ዓይነት የሥራ ዕቅድና የአፈፃፀም ሪፖርት ለሠራተኛው አልቀረበም።
ሠራተኞች በጉዳዩ ላይ ለመወያየት በተደጋጋሚ መድረክ ቢጠይቁም፣ አመራሩ ጥያቄያቸውን ወደ ጎን በመተው በዝምታ ማለፉን ይገልጻሉ።
ቅሬታ አቅራቢዎቹ እንደሚሉት፣ አመራሩ ችግሮችን በውይይት ከመፍታት ይልቅ በተቋሙ ውስጥ የራሱን “የጥቅም አደረጃጀት” በመፍጠር ሠራተኞች ላይ ዛቻና ማስፈራሪያ እያደረሰ ይገኛል።
“የስልጠና ቦታው የስጋት ቀጠና ሆኗል” የሚሉት ሠራተኞች፣ መንግስት ለስልጠና የመደበው በጀት በውስጥና በውጭ በተደራጁ ኃይሎች እየተበዘበዘ መሆኑንና ይህም በቂ ማስረጃ እንዳለው ይናገራሉ።
2. የግንባታ ፕሮጀክቶችና የንብረት ስርቆት ምስጢር
በምርመራችን ወቅት ካገኘናቸው አስገራሚ ግኝቶች መካከል፦


- የወርክሾፕ ግንባታ፦ በ2017 በጀት ዓመት 4.8 ሚሊዮን ብር በጀት የተያዘለትና ለሦስት ዓመታት ሳይሠራ የቆመው የ”አውቶ-መካኒካል ወርክሾፕ” ግንባታ አንዱ ማሳያ ነው። ይህም ከካፒታል በጀት አጠቃቀም ጋር ተያይዞ ትልቅ ጥያቄ አስነስቷል።
- የንብረት መጥፋት፦ በታኅሣሥ ወር ውስጥ ብቻ ከጋርሜንት ዲፓርትመንት 6 የዲናሞ ሞተሮች እና 1 የሲንጀር ሄድሴት መሰረቃቸው ተረጋግጧል።
- የመማሪያ አካባቢ ውድመት፦ በተቋሙ ውስጥ ሰልጣኝ ወንበሮች እጥረት ያለ ሲሆን፣ ያሉት ክፍሎችም ቆሻሻ የተከመረባቸውና ለትምህርት የማይመቹ መሆናቸውን በምስል አረጋግጠናል።
3. የአመራሩ ምላሽ፦ “ሌቦችን እያሳደድን ነው”
የኮሌጁ ዲን እንጂነር ያዕቆብ ያሲን ለዎላይታ ታይምስ (WT Media) በሰጡት ሰፊ ማብራሪያ፣ የቀረበውን ቅሬታ ሙሉ በሙሉ አስተባብለዋል።


ዲኑ እንደሚሉት፣ ኮሌጁን የተቀበሉት እስከ ፌዴራል ድረስ “የሌባ ተቋም” ተብሎ በሚታወቅበትና የቀድሞው ዲን ሥራ ጥለው በጠፉበት ወቅት ነበር።
የዲኑ ዋና ዋና የመከላከያ ነጥቦች፦
- የዕቅድና የአፈፃፀም ግልጽነት፦ ዕቅድ ከክልል ቢሮ እንደሚወርድና በማኔጅመንት ፀድቆ ለሠራተኛው እንደሚገለጽ ገልጸው፣ የፌዴራል መንግሥት ባጠናው አዲስ ጥናት መሠረት ኮሌጁ ትኩረት እንዲያደርግባቸው የተለዩት 3 የሙያ ዘርፎች (አውቶሞቲቭ፣ ሆቴልና ቱሪዝም እና አግሮ-ፕሮሰሲንግ) ብቻ በመሆናቸው፣ ቀሪዎቹ 17 የሙያ ዘርፎች ሰልጣኝ በማጣታቸው መምህራኑ ያለ ሥራ ደመወዝ እየተከፈላቸው መቆየቱ ለቅሬታው መነሻ ሊሆን እንደሚችል ጠቁመዋል።
- የፋይናንስ ማጭበርበር፦ በአሁኑ ወቅት በእስር ላይ የሚገኙ የፋይናንስ ሠራተኞች የውሃና መብራት ክፍያዎችን ፎርጅድ ሰነድ በማዘጋጀት (ለምሳሌ 5 ሺህ ብር የቆጠረውን 50 ሺህ በማድረግ) ከ1 ሚሊዮን ብር በላይ መመዝበራቸውን በኦዲት አረጋግጠናል ብለዋል።
- ስለ ስርቆቱ፦ በጋርሜንት ክፍል የተፈጸመው ስርቆት “ጣሪያ ሳይነቀልና በር ሳይከፈት” የተደረገ በመሆኑ፣ ድርጊቱን የፈጸሙት ራሳቸው አሰልጣኝ መምህራን ናቸው በሚል ተጠርጥረው በአሁኑ ወቅት በእስር ላይ እንደሚገኙና ጉዳዩ በፍርድ ቤት እየታየ መሆኑን ገልጸዋል።
- ስለ ወርክሾፑ መዘግየት፦ ግንባታው የዘገየው በክልል ፋይናንስ በኩል በቂ በጀት ባለመመደቡና በወቅቱ በነበረው የማጭበርበር ሙከራ ምክንያት እንደነበር ጠቅሰው፣ ለዘንድሮው ግንባታውን ለማጠናቀቅ 11 ሚሊዮን ብር ተመድቦ ሥራ መጀመሩን አስረድተዋል።
ዲኑ ሁኔታውን ሲያጠቃልሉ “እኛ የምንታገለው ለዓመታት ያለ ጨረታ ንብረት ሲሸጡ፣ ፎርጅድ ሰነድ ሲያዘጋጁና በተቋሙ ውስጥ በቤተሰብ ትስስር (ባልና ሚስት፣ አጎትና የእህት ልጅ) ተደራጅተው የቆዩ አካላትን ነው፤ ለዚህም ከከፍተኛ አመራር ዛቻ ጭምር እየደረሰብን ሌቦችን እያሳደድን እንገኛለን” ብለዋል።
4. ስኬቶችና ተስፋዎች
ምንም እንኳ ተቋሙ በውዝግብ ውስጥ ቢሆንም፣ በ2017 ዓ.ም በክልል ደረጃ በሥራ አፈፃፀም ከ35 ኮሌጆች 2ኛ ደረጃን መያዙንና ተማሪዎቹ በሀገር አቀፍ ውድድር የወርቅና የብር ሜዳሊያ እንዲሁም እስከ 500,000 ብር የሚደርስ የገንዘብ ሽልማት ማግኘታቸውን ዲኑ በኩራት ገልጸዋል።


በተጨማሪም በፌዴራል መንግሥት ድጋፍ ከ90 ሚሊዮን ብር በላይ በሆነ ወጪ የዳታ ሴንተር፣ የዲጂታል ስማርት ክፍልና የሶላር ኢነርጂ ፕሮጀክቶች እየተገነቡ መሆኑ ተጠቅሷል።
የ WT Media ትዝብትና ማጠቃለያ
WT Media የሁለቱንም ወገኖች ሃሳብ ካዳመጠ በኋላ፣ በኮሌጁ ውስጥ ጥልቅ የሆነ የኦዲትና የፍትህ ምርመራ አስፈላጊ መሆኑን ይገነዘባል።
በሠራተኞች በኩል የሚነሳው የመልካም አስተዳደር ጥያቄና በአመራሩ በኩል የሚጠቀሰው “የሌቦች ስብስብን የመበተን ትግል” በገለልተኛ አካል ተጣርቶ እውነቱ ሊወጣ ይገባል። በተለይም በእስር ላይ ያሉ ሠራተኞች ጉዳይና የተቋረጡ ግንባታዎች ፍፃሜ የክልሉ መንግስት ትኩረት ሊሰጠው የሚገባ አንኳር ጉዳይ ነው።
ኮሌጅ ለቀረበው ቅሬታ ምላሽ ግልፀኝነት በተሞላ መንገድ የሰጠበት መንገድ WT Media ለህብረተሰቡ ሙሉና ሚዛናዊ መረጃ ለማቅረብ እያደረገ ያለውን ጥረት የሚያግዝ በመሆኑ ለሰጡት ምላሽ እያመሰገንን ሌሎች ተቋማትም መሠል አካሄድ እንዲከተሉ ጥሪ ያደርጋል።
እውነትን ለሕዝብ ማድረሳችንን እንቀጥላለን!
#WTMedia #WolaitaTimes #SodoPolytechnicCollege #Ethiopia #CorruptionInvestigation #Wolaita #TVET #የምርመራዘገባ #ዎላይታሶዶ #ኢትዮጵያ