የዎላይታ ሶዶ መናኸሪያ

ከስምሪት ኃላፊዎች እስከ ትራፊክ ፖሊሶች፦ በዎላይታ ሶዶ መናኸሪያ ተጓዦችን የማገትና የመዝረፍ ስልታዊ ድራማ ተጋለጠ

በዎላይታ ሶዶ መናኸሪያ ተገቢውን አገልግሎት አጥተው ለምዝበራ ስለሚዳረጉ ዜጎች የቀረበ ጥልቅ ዘገባ

የደቡብ ኢትዮጵያ ክልል መዲና ባለሰባት በር የሆነችው ዎላይታ ሶዶ ከተማ መናኸሪያ ለተጓዦች ቀልጣፋ አገልግሎት መስጠት ሲገባው፣ በአሁኑ ወቅት በተደራጁ የመናኸሪያ ሠራተኞች፣ በሾፌሮች እና በአንዳንድ የጸጥታ አካላት ትብብር ተጓዦች የሚታገቱበት እና የሚበዘበዙበት ስፍራ መሆኑን በዓይን ምስክሮች የተደገፈ ጥልቅ ዘገባ WT Media አዘጋጅቷል።

በህብረተሰቡ ቅሬታ መነሻ በዘርፉ የሚስተዋለውን ከፍተኛ ችግር ለሚመለከታቸው አካላት በግልፅ ለማሳየትና ለመጠቆም የ WT Mediaተጓዥ መረጃ ሰብሳቢ በአይን የተመለከተውን፣ የደረሰበትን እንግልትና የመፍትሄ አቅጣጫዎችን ባካተተ መንገድ አጠናቅሯል።

በተለይም ከአዲስ አበባ ወደ ተለያዩ የገጠር ወረዳዎች የሚመጡና የሚመለሱ ዜጎች በጠራራ ጸሐይ “ሲኦልን” እያዩ መሆናቸው ተጋልጧል።

1. “የመኪና የለም” ድራማ እና የዋጋ ጭማሪ ሴራ

እለቱ ረቡዕ ጥር 20 ቀን 2018 ዓ.ም ነው። ወደ አዲስ አበባ ለመመለስ መናኸሪያ የገቡ ተጓዦች፣ ከመናኸሪያ ሠራተኞችና ከሾፌሮች የተደራጀ ሴራ ገጥሟቸዋል።

  • የተስፋ መቁረጥ ስልት፦ ተጓዦች መናኸሪያ ሲገቡ “ወደ አዲስ አበባ የሚሄድ መኪና የለም፤ ከፈለጋችሁ በፐርሰንት (ከታሪፍ ውጭ) ጨምራችሁ መሄድ ትችላላችሁ” በሚል የሐሰት ወሬ እንዲደናገጡ ይደረጋል።
  • የታሪፍ ጥሰት፦ መደበኛው የታሪፍ ዋጋ 1060.69 ብር ሆኖ እያለ፣ ተጓዦች 1,100 ብር እንዲከፍሉ ይገደዳሉ። ይህ ክፍያ “የአገልግሎት ክፍያ” በሚል ሽፋን ቢቀርብም፣ ዓላማው ግን ተጓዡን ማስጨነቅና ከተቀመጠው ሕጋዊ የታሪፍ ጣሪያ በላይ መበዝበዝ መሆኑን ምስክሮች ያስረዳሉ።

2. 20 ሰው ትርፍ ጭኖ የሚወጣ “የሞት መኪና” እና የስምሪት ክፍሉ ሚና

የታዘብነው እጅግ አደገኛ ድርጊት ግን የመኪናው አጫጫንና ስምሪት ነው ይላሉ ምስክሩ።

  • ሕገ-ወጥነት፦ ታርጋ ቁጥሩ ኮድ 3 – AA 24799 የሆነው ተሽከርካሪ፣ በወንበር ቁጥር ከጫነው ተጓዥ በተጨማሪ 20 ትርፍ ተሳፋሪዎችን እንዲጭን ተደርጓል።
  • የኃላፊዎች ተሳትፎ፦ ይህ የደህንነት ጥሰት የተፈጸመው የመናኸሪያው የስምሪት ኃላፊ ከሾፌሩና ከረዳቱ ጋር በጋራ በፈጠሩት የጥቅም ትስስር ነው። ተሳፋሪዎች “አደጋ ሊደርስብን ይችላል” ብለው ቢቃወሙም፣ “እኛ ከስምሪት ሰጪው አካል ጋር ተነጋግረን ነው የምንሠራው፤ ምን አገባችሁ?” በሚል ዛቻ ዝም እንዲባሉ ተደርጓል።

3. የትራፊክ ፖሊሶች እና የሾፌሮች “የቅንጅት ክስ” ድራማ

መኪናው ከሶዶ ወጥቶ ቦዲት ከተማ አካባቢ ሲደርስ የተፈጸመው ድርጊት የሙስናውን ጥልቀት ያሳያል።

  • ቀጥታ ስልክ ለትራፊክ፦ የመኪናው ረዳት ለትራፊክ ፖሊሷ ደውሎ “እየመጣን ስለሆነ በትርፍ ክሰሽን” በማለት በጠራራ ጸሐይ ቀጠሮ ይይዛል።
  • ሰንካላ ክስ፦ ትራፊክ ፖሊሷም መኪናውን አስቁማ፣ ሕዝቡን ሳታነጋግርና የጭነቱን አደገኛነት ሳታይ፣ የክስ ወረቀት ብቻ ሰጥታ ታሰናብታለች። ይህ “ክስ” ሾፌሩ ከፊት ለሚጠብቁት ፖሊሶች “ተከስቻለሁ” የሚል ሰበብ እንዲኖረውና ያለምንም ከልካይ ትርፍ ጭኖ እንዲጓዝ ለማመቻቸት የሚደረግ የደመወዝ ማሟያ ድራማ መሆኑ ተጋልጧል።

4. አግቶ ማቆየት እና ተጨማሪ 100 ብር መጠየቅ

ጉዞው ቡታጅራ ከተማ ሲደርስ ከቀኑ 10 ሰዓት ሆኖ ነበር። በዚህ ወቅት ሾፌሩና ረዳቱ አዲስ ስልት ቀየሱ፦

  • አዲስ ማስፈራሪያ፦ “በቡታጅራ መስመር ብንሄድ ፖሊስ ይይዘናል፤ ስለዚህ በዝዋይ (Highway) ለመሄድ እያንዳንዱ ተሳፋሪ ተጨማሪ 100 ብር ማዋጣት አለበት” የሚል ጥያቄ ቀረበ።
  • እገታ፦ ተሳፋሪዎች “ወደ ፖሊስ ጣቢያ ውሰዱን እንጂ አንከፍልም” በማለታቸው፣ ተጓዦች ለረጅም ሰዓታት መኪናው ውስጥ ታግተው እንዲቆዩ ተደርጓል። 

ሾፌሩና ረዳቱ “ካልከፈላችሁ መንገድ ላይ ታድራላችሁ” በሚል ተጓዡን ሲያሸብሩ ቢቆዩም፣ በመኪናው ውስጥ የነበሩ ጥቂት ነቃ ያሉ ተሳፋሪዎችና የመንግሥት የደህንነት ባልደረቦች ድርጊቱን በቪዲዮ በመቅረጽና ኃይለኛ ተቃውሞ በማሳየታቸው፣ ሾፌሩ ሳይወድ በግድ ጉዞውን ለመቀጠል ተገዷል።

የ WT Media ማጠቃለያና ምክረ-ሐሳብ

ይህ አሳፋሪ ድርጊት የዎላይታን መልካም ገጽታ የሚያበላሽ እና ዜጎችን ለከፋ እንግልት የሚዳርግ ነው። በመሆኑም የሚከተሉት እርምጃዎች በአስቸኳይ እንዲወሰዱ WT Mediaጥሪ ያቀርባል፦

  1. የጥፋተኞች ተጠያቂነት፦ በትራፊክና በመናኸሪያ ስምሪት ስም ተደራጅተው ምዝበራ በሚፈጽሙ አካላት ላይ (በተለይም ስሙ የተጠቀሰው የስምሪት ኃላፊ ላይ) ጥብቅ ምርመራ ተደርጎ ሕጋዊ እርምጃ ሊወሰድ ይገባል።
  2. የስነ-ምግባር ስልጠና፦ ለሾፌሮች፣ ረዳቶች እና የመናኸሪያ ሠራተኞች የደንበኛ አያያዝ ሥነ-ምግባር ስልጠና መሰጠት አለበት።
  3. ገለልተኛ ቁጥጥር፦ ተሳፋሪዎች በትርፍ ተጭነው ከመናኸሪያ እንዳይወጡና በመንገድ ላይ የሚደረገው የትራፊክ ቁጥጥር ከሙስና የጸዳ መሆኑን የሚያረጋግጥ ገለልተኛ አካል ሊመደብ ይገባል።
  4. የአካባቢ ገጽታ ጥበቃ፦ ጊፋታ በዩኔስኮ በተመዘገበበትና ቱሪስቶች በሚጎርፉበት በዚህ ወቅት፣ እንዲህ ያሉ አስነዋሪ ድርጊቶች የአካባቢውን ገጽታ እንዳያበላሹ የመንግሥት አካላት ኃላፊነታቸውን ሊወጡ ይገባል።

የጭቁኖች ድምፅ – WT Media