GridArt_20260411_182651696

የደቡቡ ምሁር ስለ ምስራቁ ፕረዚዳንት ምን አለ? የሰሞኑ የሙስጠፌ መሐመድ ቃለምልልስ አንድምታዎች – በ WT Media ተጋባዥ ፀሐፊ በሆኑት በፕሮፌሰር ማሪንዶስ ጦና የተጠናቀረ ጥልቅ ትንታኔ

የሶማሌ ክልል ፕሬዝዳንት አቶ ሙስጠፌ መሐመድ ሰሞኑን ከባይፈርስ ሚዲያ ጋዜጠኛ ስሜነህ ባይፈርስ ጋር ያደረጉት ቆይታ በሀገሪቱ ፖለቲካዊ ምህዳር ውስጥ በርካታ መነጋገሪያ ነጥቦችን ጥሏል። ይህ ቃለ-ምልልስ በተለይ በ ኢትዮ ፎረም ላይ የተሰራጨውንና ከሶማሊኛ ተተርጉሟል የተባለውን ንግግር ለማስተባበል ታስቦ የተደረገ ይመስላል።

ፕሬዝዳንቱ የቀረቡባቸውን ክሶች ለማክሸፍ የሞከሩበትን መንገድና በውስጡ ያዘላቸውን ስውር አንድምታዎች እንደሚከተለው በዝርዝር እንተነትናለን።

  1. የሰላምና የሰብዓዊ መብት ሙግት፦ ማጋነን ወይንስ እውነታ?

ፕሬዝዳንት ሙስጠፌ ወደ ሥልጣን ከመጡ በኋላ በሶማሌ ክልል አንጻራዊ ሰላም መስፈኑን፣ የውጭ ኢንቨስትመንት በከፍተኛ ሁኔታ መጨመሩንና የሰብዓዊ መብት አያያዝ መሻሻሉን በስፋት ተናግረዋል። ክልሉ እንደ ቀድሞው በ Human Rights Watch አለመከሰሱንም እንደ ስኬት አንስተዋል።

ሆኖም ግን “በሶማሌ ክልል ከአውሮፓና ከአሜሪካ በላይ የሰብዓዊ መብት ይከበራል” ያሉት ንግግር ከማጋነንም ያለፈና እውነታውን የካደ ሆኖ አግኝቼዋለሁ። ከጥቂት ዓመታት በፊት በአንዲት ሶማሌያዊት ሕፃን ላይ የደረሰውን መደፈር ተከትሎ፣ በክልሉ በሚኖሩ የደቡብ ተወላጆች ላይ የደረሰው ጥቃትና መፈናቀል ለሰማ ሰው፣ የሰብዓዊ መብት አያያዙ ገና ብዙ የሚቀረው መሆኑን ይረዳል እንጂ እንደ አውሮፓ ነው ለማለት አይደፍርም።

  1. የደኅንነት ሚናና የዲፕሎማሲው ውድቀት

ፕሬዝዳንቱ በኩራት ከገለጿቸው ነጥቦች አንዱ፣ ክልላቸው ለአልሸባብ ጥቃት መገታት የተጫወተው ሚና ነው። የሶማሌ ክልል ብቁ ተሳትፎና ለብሔራዊ መረጃና ደኅንነት አገልግሎት የሚሰጠው መረጃ ወሳኝ መሆኑ ውሃ የሚያነሳ ነጥብ ነው።

ነገር ግን እዚህ ጋር ትልቅ ክፍተት ይታያል። ክልሉ በመረጃና ደኅንነት ዘርፍ እንዲህ ያለ የማይተካ ሚና ካለው፣ በብልጽግና ዘመን በሶማሊያ ጉዳይ ላይ የሚታየው የኢትዮጵያ የዲፕሎማሲ ውድቀት ምንጩ ምንድነው? ሙስጠፌ ይህንን ነጥብ በዝምታ ማለፋቸው ወይም ጋዜጠኛው አለመጠየቁ፣ የፌደራል መንግሥቱ የሶማሌ ክልልን በውጭ ጉዳይና በዲፕሎማሲ ሥራዎች ላይ እንዳይሳተፍ ዕድል ነፍጎታል የሚል ጠንካራ ግምት እንዲወሰድ ያደርጋል።

  1. የታሪክ አሻራዎች፦ ከልጅ ኢያሱ እስከ ገርማሜ ነዋይ

ሙስጠፌ ባለፉት 150 ዓመታት ተገፍተን ኖረናል የሚለውን ሐሳብ በደፈናው አንስተዋል። እርግጥ ነው፣ መገለል እንደነበረ ባይካድም የታሪክ አሻራዎችን ግን ነጥሎ ማየት ያስፈልጋል። በተለይ በዎላይታ አውራጃ እጅግ ተወዳጅ የነበሩት ገርማሜ ነዋይ፣ ወደ ጅግጅጋ አውራጃ በተመደቡበት ወቅት የሶማሌ ሕዝብ በገዛ ሀገሩ ሁለተኛ ዜጋ መሆኑን ተመልክተው በቁጭት ተነስተው ነበር።

ገርማሜ Ogaden Youth Scout በማቋቋም፣ የጥሪጊያ መንገዶችን በማሰራትና ጅግጅጋን የንግድ ማዕከል በማድረግ የጣሉት አሻራ ዛሬም ድረስ ይታያል። ከዚህ በተጨማሪ “የክርስቲያኑ ብቻ ሳይሆን የእስላሙም ንጉሥ ነኝ” ያሉት ልጅ ኢያሱ ለሶማሌ ሕዝብ የነበራቸውን ክብር ሙስጠፌ ታሪክን ሲዘክሩ እውቅና ሊሰጡት የሚገባ ነበር። 150 ዓመታትን በደፈናው የጭቆና ዘመን አድርጎ መዝጋት የታሪክ ሚዛናዊነት ይጎድለዋል።

  1. የሕወሓት ጥላቻና የትግራይ ሕዝብ መገፋት

ፕሬዝዳንቱ ለሕወሓትና ለመለስ ዜናዊ ያላቸውን ከፍተኛ ጥላቻ መደበቅ አልፈለጉም። ወንድማቸው በዛ ዘመን መገደሉ ለዚህ ጥላቻቸው ትልቅ ምክንያት ሊሆን ይችላል። ነገር ግን ይህ ግላዊና ድርጅታዊ ጥላቻቸው፣ አሁን በትግራይ ሕዝብ ላይ እየደረሰ ያለውን በደል እንዳይመለከቱ ጋርዷቸዋል።

የሶማሌ ክልል ራስን በራስ የማስተዳደር መብት እንዲከበርለት ሙስጠፌ እንደሚሟገቱት ሁሉ፣ አሁን በትግራይ ሕዝብ ላይ እየደረሰ ያለውን ወረራ፣ መፈናቀልና ምርጫ የመከልከል በደል እንደ አንድ ፌደራሊስት እንዴት ያዩታል? የ”ኦሮ-ማራ” ብልጽግና በትግራይ ሕዝብ ላይ እያደረሰ ያለው መገፋት፣ ድሮ ሶማሌዎች ይገፉበት ከነበረው ሁኔታ ጋር የሚቀራረብ መሆኑን ሙስጠፌ ሊያስተውሉ ይገባል።

  1. የዎላይታ ክልል ጥያቄና የብልጽግና አቋም

የሶማሌ ክልል ተወላጁ አቶ አደም ፋራህ በቅርቡ ዎላይታ ሶዶ መጥተው በደቡብ ኢትዮጵያ ፖለቲካ ላይ የታዘቧቸው ነጥቦች በብልጽግና አመራሮች ተቀባይነት አለማግኘታቸው ይነገራል። በተለይ አገኘሁ ተሻገር የዎላይታን የክልል ጥያቄ ለማፈንና የሕዝቡን ፍላጎት ለመቀልበስ የተጠቀሙበት የጉልበት መንገድ ላይ ሙስጠፌ ያላቸው አቋም ምንድነው? ፍትሕ ለሶማሌ ብቻ ሳይሆን ለዎላይታም እኩል መሆን የለባትም ወይ?

  1. የወደፊት ምክረ-ሐሳቦች A. የሶማሌ ክልል ቴሌቪዥን በአዲስ አበባ ስቱዲዮ ከፍቶ በአማርኛ ፕሮግራሞችን ቢመድብ፣ ሌሎች ኢትዮጵያውያን ስለ ሶማሌ ሕዝብ ያላቸውን ግንዛቤ ለማሳደግ ይረዳል። B. የክልሉን የቱሪስት መስህቦች ሌሎች ኢትዮጵያውያን እንዲጎበኙ ማበረታታትና ወጣቶች፣ አርቲስቶችና ጋዜጠኞች ክልሉን እንዲጎበኙ ዕድል መፍጠር። C. በአዲስ አበባ ቦሌ ሚካኤል አካባቢ የሶማሌን ሕዝብ የሚወክል ሐውልት ወይም ምልክት ቢቆም ለብሔራዊ መግባባት ትልቅ ትርጉም ይኖረዋል።

ፕሬዝዳንት ሙስጠፌ መሐመድ በአቅማቸውም ሆነ በማሳመን ችሎታቸው ከተሻሉ የብልጽግና አመራሮች አንዱ መሆናቸው ባይካድም፣ ለሕወሓት ያላቸው ጥላቻ ግን በሀገሪቱ ላይ የተደቀነውን የአግላይነትና የጦርነት አዙሪት እንዳይመለከቱ ሊጋርዳቸው አይገባም። የፌደራል ሥርዓቱ Self-rule ብቻ ሳይሆን Shared-rule (የጋራ አገዛዝ) መሆኑ ሊሰመርበት ይገባል።

ለሶማሌ ክልል ሕዝብ መልካም ምኞቴን እየገለጽኩ፣ እውነተኛ ፌደራሊዝም ለሁሉም ብሔር ብሔረሰቦች እኩል እንዲሆን እመኛለሁ።

በአጠቃላይ፣ የፕሬዝዳንት ሙስጠፌ መሐመድ የፖለቲካ ጉዞና አሁን የያዙት አቋም ለሶማሌ ክልል ተስፋ ሰጪ ቢሆንም፣ ሀገራዊ አንድነትና እውነተኛ ፌደራሊዝም ሊረጋገጥ የሚችለው ግን የሕወሓት ጥላቻን ወይም የሌሎች አካላትን ወገንተኝነት ተሻግሮ ለሁሉም ብሔር ብሔረሰቦች እኩልነትና ፍትሕ ሲሰፍን ብቻ ነው።

የሶማሌ ክልል ልምድ ለሌሎች ክልሎችም ትምህርት መሆን ያለበት ሲሆን፣ የፌደራል መንግሥቱም ሁሉንም አሳታፊ ያደረገ የዲፕሎማሲና የውስጥ ፖለቲካ ሥርዓት እንዲከተል ግፊት ሊደረግበት ይገባል በማለት የ WT Media ተጋባዥ ጸሐፊ ምልክታቸውን አጋርተዋል።

ፕሮፌሰር ማሪንዶስ ጦና የዘውትር የ WT Media ተጋባዥ ጸሐፊ ሲሆኑ፣ በኢትዮጵያና በአፍሪካ ቀንድ ፖለቲካ፣ በፌደራሊዝም እና በታሪክ ዘርፎች ላይ ጥልቅ ትንታኔዎችን የሚያቀርቡ ምሁር ናቸው።