የቀድሞ የፋና ብሮድካስት ኮርፖሬሽን ጋዜጠኛ ሳልሳዊት ባይነሳኝ በአዲስ አበባ ፖሊስ ኮሚሽን በቁጥጥር ስር ውላ እንደሚገኝ የቅርብ ቤተሰቦቿ አስታወቁ። ጋዜጠኛዋ በፖሊስ የተያዘችው ሰኞ ሰኔ 1 ቀን 2018 ዓ.ም (ሰኔ 8 ቀን 2026 እ.ኤ.አ) በፒያሳ አካባቢ መሆኑ ታውቋል።
የጋዜጠኛ ሳልሳዊት ባይነሳኝ እህት ሃይማኖት ባይነሳኝ ለሀገር ውስጥ የመገናኛ ብዙሃን በሰጠችው መረጃ መሰረት ጋዜጠኛዋ በቁጥጥር ስር ከዋለች አሁን ከአንድ ሳምንት (ሰባት ቀናት) በላይ አስቆጥራለች።
ጋዜጠኛ ሳልሳዊት ከተያዘችበት እለት ጀምሮ እስካሁን ድረስ ባሉት ተከታታይ ቀናት ውስጥ በማንኛውም የህግ አካል ወይም ፍርድ ቤት ፊት እንዳልቀረበች እህቷ በከፍተኛ ስጋት ገልጻለች። ይህ ድርጊት ተጠርጣሪዎች በቁጥጥር ስር በዋሉ በ48 ሰዓታት ውስጥ ፍርድ ቤት መቅረብ አለባቸው የሚለውን የሀገሪቱን የህገ-መንግስት ድንጋጌ የሚጥስ መሆኑን የህግ ባለሙያዎች ይናገራሉ።
ፖሊስ ጋዜጠኛ ሳልሳዊት ባይነሳኝን በቁጥጥር ስር ያዋለበትን ዝርዝር ምክንያትም ሆነ በምን አይነት የወንጀል ድርጊት እንደጠረጠራት እስካሁን ለቤተሰቦቿ ያሳወቀው ይፋዊ ማብራሪያ የለም።

ጋዜጠኛ ሳልሳዊት ባይነሳኝ በቁጥጥር ስር ከመዋሏ ጥቂት ቀናት ቀደም ብሎ፣ ግንቦት 13 ቀን 2018 ዓ.ም የጀርመን ድምፅ ራዲዮ (DW Amharic) ከጋዜጠኛዋ ጋር ባደረገው ቃለ-መጠይቅ ላይ በራሷ የዩቲዩብ ቻናል እና ማህበራዊ ሚዲያ ዘዴዎች ስለምታስተላልፋቸው መልዕክቶች እና ይዘቶች በሰፊው መዘገቡ ይታወሳል።
ሳልሳዊት ቀደም ሲል በፋና ብሮድካስት ኮርፖሬሽን ውስጥ በጋዜጠኝነት ያገለገለች ሲሆን ከቅርብ ጊዜ ወዲህ ግን በራሷ ገጽ የምታቀርባቸው ሚዛናዊ ትችቶች ማህበራዊና ፖለቲካዊ መረጃዎች እና ሳቢ አቀራረቦች በብዙዎች ዘንድ እንድትታወቅና ከፍተኛ ተከታታዮችን እንድታገኝ አድርጓታል።
በአዲስ አበባ እና በተለያዩ የሀገሪቱ ክፍሎች የጋዜጠኞች፣ የሚዲያ ባለሙያዎች እና ሰላማዊ በሆነ መንገድ ሀሳባቸውን የሚገልጹ ዜጎች ያለ ፍርድ ቤት ትዕዛዝ መታሰር እና ለቀናት ሳይከሰሱ መቆየት በኢትዮጵያ ያለውን የሀሳብ ነፃነት እና የፕሬስ አውድ አደጋ ላይ የሚጥል መሆኑን የሰብዓዊ መብት ተሟጋቾች በተደጋጋሚ ሲገልጹ ቆይተዋል።
ቤተሰቦቿ ጋዜጠኛዋ በአስቸኳይ ፍርድ ቤት ቀርባ የህግ ከለላ እንድታገኝ እና የተያዘችበት ምክንያት እንዲታወቅ በመጠየቅ ላይ ይገኛሉ። የአዲስ አበባ ፖሊስ ኮሚሽን በጉዳዩ ላይ እስካሁን የሰጠው ይፋዊ መግለጫ የለም።
WT Media የጉዳዩን ሂደት በቅርብ እየተከታተለ ተጨማሪ መረጃዎችን ለተከታታዮቹ የሚያደርስ ይሆናል።