1000162146

ሲፒጄ ከሩብ ክፍለ ዘመን በላይ በኤርትራ የታሰሩ 16 ጋዜጠኞችን በክብር ሽልማት በማውደስ ሁኔታቸው እንዲጣራም ጠይቋል።

በኬንያ ናይሮቢ አጋ ካን ዩኒቨርሲቲ (Aga Khan University) እና በዊትስ የጋዜጠኝነት ማዕከል (Wits Centre for Journalism) አዘጋጅነት እየተካሄደ ባለው 22ኛው ዙር የ2026 አፍሪካ የምርመራ ጋዜጠኝነት ጉባኤ (AIJC 2026) ላይ በኤርትራ ለሩብ ክፍለ ዘመን (25 ዓመታት) ያህል ያለ ፍርድ ሂደት በጨለማ እስር ቤት ታስረው የሚገኙ ጋዜጠኞች አሳዛኝ ሁኔታ እና የሰብዓዊ መብት ጭቆና የዓለም አቀፍ ትኩረት ማዕከል ሆኖ አምሽቷል።

​በጉባኤው ልዩ የካርሎስ ካርዶሶ መታሰቢያ መድረክ (Carlos Cardoso Memorial Lecture) ላይ የጋዜጠኞች መብት ተሟጋች ድርጅት (CPJ) መሪዎች፣ የጋዜጠኛ ቤተሰቦች፣ የቀድሞ የኤርትራ እስረኞች እና ደራሲያን በተገኙበት በተካሄደው ስሜት ቀስቃሽ መርሃ ግብር፣ የታሰሩ ጋዜጠኞችን ድምጽ ለማስተጋባትና ፍትህ ለማጠየቅ ሰፊ ጥሪ ቀርቧል።

​በመድረኩ ንግግር ያደረጉት የ CPJ የአፍሪካ ፕሮግራም አስተባባሪ ሙቶኪ ሙሞ (Muthoki Mumo) እና የ CPJ ዋና ስራ አስፈፃሚ ጆዲ ጊንስበርግ (Jodie Ginsberg)፣ በኤርትራ እ.ኤ.አ. ከሴፕቴምበር 2001 ጀምሮ የመንግስት የግል ፕሬስ እገዳን ተከተሎ የታሰሩትና “ኤርትራ 16” በሚል የሚታወቁት ጋዜጠኞች ያሉበት ሁኔታ አሁንም በምስጢር የተያዘ መሆኑን አብራርተዋል።

​የ CPJ መሪዎች አስምረው እንደተናገሩት፣ የኤርትራ መንግስት የታሰሩት ጋዜጠኞች በህይወት መኖራቸውን የሚያረጋግጥ ይፋዊ ማስረጃ እንዲያቀርብ እና ያለ አንዳች ቅድመ ሁኔታ በአስቸኳይ እንዲፈታቸው ጠይቀዋል።

በእስር ላይ የሚገኙት ጋዜጠኞች አማኑኤል አስራት፣ ዳዊት ኢሳቅ፣ ግብረሂወት ከለታ፣ ማቴዎስ ሀብተአብ እና ባልደረቦቻቸው የአካላቸው አለመገኘት ቢኖርም የጸና ሙያዊ መስዋዕትነታቸውን በማሰብ የ 2026 CPJ ዓለም አቀፍ የፕሬስ ነጻነት አዋርድ (2026 International Press Freedom Award) ተላላፊ ባለቤት መሆናቸው መገለጹ ትልቅ ታሪካዊ ክስተት ሆኗል።

​​በኤርትራ እስር ቤት ለስድስት ዓመታት ያህል በጨለማ ክፍል ውስጥ ታስራ አሰቃቂ እንግልቶችን ካሳለፈች በኋላ ማምለጥ የቻለችው ደራሲና ጋዜጠኛ ይርጋለም ፍሰሃ፣ በመድረኩ ላይ ተገኝታ በእስር ላይ ለሚገኘው የዜና ኤዲተር አማኑኤል አስራት የጻፈችውን ደብዳቤ አንብባለች።

​“አማኑኤል፣ አንተና ባልደረቦችህ በሌላችሁበት ቦታ ስለ ተቀበላችሁት መከራና ስቃይ ሳይሆን በስራችሁ በአካል ተገኝታችሁ ይህንን ሽልማት ልትቀበሉ ይገባ ነበር። በብቸኝነት የተዘጋባችሁ እስረኞች በየቀኑ ‘አሁንም የሚያስታውሰኝ ሰው አለ?’ ብላችሁ መጠየቅ ምን እንደሚመስል ማሰብ በራሱ ከባድ ነው” ስትል ታዳሚውን ያስቆዘመ ምስክርነት አቅርባለች።

​ይርጋለም አክላም በስብሰባው ላይ ለተገኙት ከ450 በላይ የበርካታ አፍሪካ ሀገራት የምርመራ ጋዜጠኞች፣ ድምጻቸውንና ሙያዊ መድረካቸውን በመጠቀም የኤርትራ መንግስት የታሰሩትን ጋዜጠኞች በአስቸኳይ እንዲፈታ እና ታሪካቸው ተረስቶ እንዳይቀር ዘመቻ እንዲያደርጉ ጥሪ አቅርባለች።

​በመታሰቢያ መድረኩ ወቅት የታሰሩት ጋዜጠኞች ቀደም ሲል የጻፏቸው ድቅድቅ እውነቶች፣ መጣጥፎች እና ግጥሞች በይፋ ለታዳሚው የተነበቡ ሲሆን በእስር ላይ ያሉ ጋዜጠኞች የቤተሰብ አባላት ያስተላለፏቸው የቪዲዮ ምስክርነቶች እና አሳዛኝ መልእክቶች ለታዳሚው ተስፋፍተው ቀርበዋል።

​ከቀረቡት ንግግሮች እና ከተነበቡት ጽሁፎች በኋላ፣ በቦታው ከተገኙ አህጉራዊና ዓለም አቀፍ ጋዜጠኞች በርካታ ጥያቄዎች የቀረቡ ሲሆን በ CPJ መሪዎችና በይርጋለም ፍሳሃ ሰፊ ምላሽና ማብራሪያ ተሰጥቶባቸዋል።

ውይይቱ የጋዜጠኞችን ደህንነት ማስጠበቅ፣ በስደት የሚኖሩ ጋዜጠኞች የሚያጋጥሟቸው ተደራራቢ ፈተናዎች እና የፕሬስ ነጻነትን ማስከበር በሚቻልበት መንገድ ላይ ያተኮረ ነበር።

​WT Media በመድረኩ ላይ በመገኘት የሁኔታውን ሂደት እና የታሰሩ ጋዜጠኞችን ድምጽ ለህዝብ ለማድረስ በሚደረገው ጥረት ላይ ንቁ ተሳትፎ አድርጓል።

ይህ በናይሮቢ እየተካሄደ ያለው 22ኛው የአፍሪካ የምርመራ ጋዜጠኝነት ጉባኤ (AIJC)፣ ከደቡብ አፍሪካ ውጪ ሲካሄድ በታሪክ የመጀመሪያው ነው። ከኖቬምበር 10 እስከ 12 ለሚቆዩት ሶስት ቀናት ጉባኤው አለም አቀፍ ጋዜጠኞችን፣ ለጋሾችን እና የሚመለከታቸው ባለድርሻ አካላትን በስፋት ያሰባሰበ ነው።

​ይህ ታሪካዊ ስብሰባ በኤርትራ የታሰሩትን ጋዜጠኞች ጉዳይ ለአህጉሪቱ እና ለዓለማችን የፊት መስመር አጀንዳ በማድረግ፣ የጋዜጠኞችን ደህንነትና የመናገር ነጻነት ለማስከበር የጋራ ርብርብ እንዲደረግ አቅጣጫ አስቀምጧል።