ከሦስት ወራት በፊት በደቡብ ኢትዮጵያ ክልል ጅንካ ዞን ተከስቶ የነበረውና የበርካቶችን ሕይወት የቀጠፈው አደገኛ የማርበርግ (Marburg) ቫይረስ ወረርሽኝ ሙሉ በሙሉ በቁጥጥር ሥር መዋሉን የጤና ሚኒስቴር ዛሬ ሰኞ ጥር 18/2018 ዓ.ም. በይፋ አስታወቀ።
የጤና ሚኒስትሯ ዶ/ር መቅደስ ዳባ ዛሬ በአዲስ አበባ ከተማ በተካሄደ የማብሰሪያ መርሃ ግብር ላይ እንደገለጹት፣ በዓለም የጤና ድርጅት (WHO) አሠራር መሠረት ላለፉት 42 ተከታታይ ቀናት ምንም ዓይነት አዲስ ታካሚ ባለመመዝገቡ ቫይረሱ ከኢትዮጵያ “ጨርሶ ተወግዷል” ብለዋል።

በወረርሽኙ ሂደት የተመዘገቡ መረጃዎች፦
- 14 ሰዎች በቫይረሱ መያዛቸው በላብራቶሪ ተረጋግጧል።
- 9 ወገኖቻችን ሕይወታቸው አልፏል።
- 5 ሰዎች ደግሞ ሙሉ በሙሉ አገግመዋል።
ይህ ወረርሽኝ በቁጥጥር ሥር እንዲውልና የዓለም አቀፉ ማኅበረሰብ ትኩረት እንዲስብ በማድረግ ረገድ WT Media የላቀ እና ታሪካዊ ሚና መጫወቱ ይታወሳል።
- ዝምታን የሰበረው የWT Media ዘገባ፦ ወረርሽኙ በጅንካ ሆስፒታል ተከስቶ “ምንነቱ ባልታወቀ በሽታ” ሰዎች እየረገፉ በነበረበት ወቅት፣ የሀገር ውስጥም ሆነ ዓለም አቀፍ ሚዲያዎች ዘገባ ሳይሠሩ WT Media መረጃውን ከምንጩ በማግኘት ለዓለም አሳውቋል።
- ከጤና ሚኒስቴር እስከ WHO፦ የጣቢያው ተከታታይ ዘገባዎች የፌዴራል ጤና ሚኒስቴር መግለጫ እንዲሰጥ ከማስገደዳቸውም በላይ፣ የዓለም ጤና ድርጅት (WHO) በአስቸኳይ 300,000 ዶላር መድቦ ባለሙያዎችንና ቁሳቁሶችን ወደ ስፍራው እንዲልክ ከፍተኛ ተፅዕኖ ፈጥሯል።
- የሕይወት አድን ጋዜጠኝነት፦ በወቅቱ የነበረውን ስጋት ቀድሞ በማውጣት፣ ወረርሽኙ ከአካባቢው አልፎ ወደ ሌሎች የሀገሪቱ ክፍሎችና ጎረቤት ሀገራት እንዳይሰራጭ በማድረግ ረገድ WT Media የቅድመ ማስጠንቀቂያ ዋነኛ ምንጭ ሆኖ አገልግሏል።
የጤና ሚኒስትሯ ዶ/ር መቅደስ ዳባ በንግግራቸው፤ “ምንም እንኳ የዘጠኝ ወገኖቻችንን ሕይወት ብናጣም፤ ወረርሽኙ ሊያደርስ ከሚችለው ከባድ እና ውስብስብ ችግር አንጻር አገር እና ሕዝባችንን መታደግ ችለናል። እንኳን ደስ አላችሁ፤ እንኳን ደስ አለን” ሲሉ ወረርሽኙ መጠናቀቁን አብስረዋል። እንዲሁም ሕይወታቸውን ጭምር በመስጠት ከቫይረሱ ጋር ፊት ለፊት ተጋፍጠው ያሸነፉ የጤና ባለሙያዎችን አመስግነዋል።

WT Media ከጅንካ ሆስፒታል ምድር ጀምሮ እስከ ዓለም አቀፍ ተቋማት ድረስ የነበረውን የቫይረሱን እንቅስቃሴ በቅርበት ሲዘግብ የቆየ ሲሆን፣ ዛሬ ወረርሽኙ መጠናቀቁን ሲያበስር ታላቅ ደስታ ይሰማዋል። የሕይወት አድን ጋዜጠኝነትን በተግባር ያሳየው WT Media፣ ወደፊትም መሰል የሕዝብ ደኅንነት ስጋቶችን ቀድሞ በማጋለጥ በኩል ኃላፊነቱን መወጣቱን ይቀጥላል።