በአርባ ምንጭ ከተማ የተፈጸመው የ32 ሺህ ቤቶች ‘ሕጋዊ’ ዝርፊያ እና የአመራሮቹ ምስጢራዊ የጥቅም መረብ ተጋለጠ

በደቡብ ኢትዮጵያ ክልል ከፍተኛ አመራሮች መካከል ያለው የጥቅም ትስስር ለሕዝብ ሀብት ምዝበራና ለሕገ-ወጥ የመሬት ወረራ በር መክፈቱን የሚያሳዩ አዳዲስ መረጃዎች ወጡ። 

በተለይም የቀድሞው የጋሞ ዞን ዋና አስተዳዳሪና የወቅቱ የክልሉ ቤቶችና ኮንስትራክሽን ቢሮ ኃላፊ አቶ ብርሃኑ ዘውዴ፣ ከርዕሰ መስተዳድር ጥላሁን ከበደ ጋር በመመሳጠር ሰፊ የዝርፊያ መረብ መዘርጋታቸውን የ WT Media የምርመራ ዘገባ አመልክቷል።

የቀድሞው የኮንሶ ዞን ዋና አስተዳዳሪ አቶ ዳዊት ገበየሁ በሰጡት ምስጢራዊ የድምፅ ምስክርነት መሠረት፣ አቶ ብርሃኑ ዘውዴ በጋሞ ዞን በነበሩበት ወቅት 32 ሺህ ሕገ-ወጥ የከተማ ይዞታ ቤቶችን ወደ ሕጋዊነት ቀይረዋል። 

ይህ አኃዝ በጎረቤት ወላይታ ዞን ካለው 1,000 ገደማ ሕጋዊ የተደረጉ ቤቶች ጋር ሲነጻጸር፣ በአርባ ምንጭ ከተማ የተፈጸመው ተግባር በሕግ ሽፋን የተደረገ መጠነ-ሰፊ ዝርፊያ መሆኑን ያሳያል። ይህ ውሳኔ በክልሉ ካቢኔ የጸደቀ ቢሆንም፣ አሠራሩ ግን መዋቅራዊ ዝርፊያን ታሳቢ ያደረገ እንደነበር ተገልጿል።

አቶ ብርሃኑ ዘውዴ የጋሞ ዞን ዋና አስተዳዳሪ በነበሩበት ከ2010 እስከ 2014 ዓ.ም ባለው ጊዜ ውስጥ፣ ከክልሉ መስተዳድር ምክር ቤት ዕውቅና ውጭ ከ104 ሺህ ካሬ ሜትር በላይ መሬት በምደባ ስም ለተለያዩ አካላት አስተላልፈዋል። ይህ የመሬት ምደባ የተከናወነው ከርዕሰ መስተዳድር ጥላሁን ከበደ ጋር በጥቅም በመተሳሰር መሆኑን መረጃዎች ይጠቁማሉ።

በአርባ ምንጭ ከተማ በጥቅም ትስስርና ሕጋዊ አሠራርን በመጣስ የተላለፉ 53 የኢንቨስትመንት ፕሮጀክቶች መኖራቸውን WT Mediaቀደም ሲል በሰነድ አስደግፎ መዘገቡ ይታወሳል። እነዚህ ፕሮጀክቶች ለከተማዋ ዕድገት ከማበርከት ይልቅ፣ የአመራሮቹንና የቅርብ ደጋፊዎቻቸውን የግል ጥቅም ለማስጠበቅ የዋሉ መሆናቸው በድጋሚ ተረጋግጧል።

አቶ ዳዊት ገበየሁ በመረጃቸው ላይ እንደገለጹት፣ ይህ የተደራጀ ዝርፊያ በአካባቢው ሕዝብ ዘንድ በሰፊው የሚታወቅ ቢሆንም፣ አመራሮቹ ባላቸው የሥልጣን ተጽዕኖ ምክንያት ጉዳዩን በግልጽ መናገር አስቸጋሪ ሆኖ ቆይቷል። አሁን ላይ እየወጡ ያሉ መረጃዎች ግን በክልሉ ያለውን የሙስና ስፋትና ጥልቀት የሚያሳዩ ናቸው።

የቀድሞው የጋሞ ዞን ዋና አስተዳዳሪና የወቅቱ የደቡብ ኢትዮጵያ ቤቶችና ኮንስትራክሽን ቢሮ ኃላፊ አቶ ብርሃኑ ዘውዴ፣ ከርዕሰ መስተዳድር ጥላሁን ከበደ ጋር በመመሳጠር 32 ሺህ ሕገ-ወጥ ቤቶችን ወደ ሕጋዊነት ቀይረዋል። ይህ አኃዝ ከጎረቤት ዎላይታ ዞን (1,000 ገደማ) ጋር ሲነጻጸር ያለውን ሰፊ ልዩነትና የተደራጀ ሴራ የሚያሳይ መሆኑን አቶ ዳዊት ገበየሁ በድምፅ ምስክርነታቸው አረጋግጠዋል።

አቶ ብርሃኑ ዘውዴ በዞኑ አስተዳዳሪ በነበሩበት ወቅት (ከ2010-2014 ዓ.ም)፣ ከክልሉ መስተዳድር ምክር ቤት ዕውቅና ውጭ ከ104 ሺህ ካሬ ሜትር በላይ መሬት በምደባ ስም አስተላልፈዋል። ይህም በአርባ ምንጭ ከተማ ታይቶ የማይታወቅ የመሬት ቅርምት መከናወኑን ያሳያል።

በአርባ ምንጭ ከተማ በቁጥር 53 የሚሆኑ የኢንቨስትመንት ፕሮጀክቶች፣ ሕጋዊ አሠራርን ባልተከተለና በጥቅም ትስስር ላይ በተመሠረተ መልኩ መተላለፋቸውን WT Media በሰነድ ያረጋገጠው ጉዳይ ነው። እነዚህ ፕሮጀክቶች የሕዝብን ሀብት ለጥቂት አመራሮችና አጋሮቻቸው ማበልጸጊያ ሆነው እያገለገሉ ይገኛሉ።

አቶ ዳዊት ገበየሁ በመረጃው ላይ እንደገለጹት፣ ይህ የተደራጀ ዝርፊያ በአካባቢው ሕዝብ ዘንድ በሰፊው የሚታወቅ ቢሆንም፣ በአሁኑ ወቅት ባለው የሥልጣን ተዋረድና ጫና ምክንያት በግልጽ መናገር ያልተቻለበት ደረጃ ላይ ተደርሷል።

በአቶ ዳዊት ገበየሁ የቀረበው ይህ ምስክርነት በደቡብ ኢትዮጵያ ክልል ያለውን ከፍተኛ የመልካም አስተዳደር እጦትና የተደራጀ የሙስና መረብ ቁልጭ አድርጎ የሚያሳይ ነው። ይሄ የከፍተኛ አመራሩ ዘገባ የሚያመለክተው WT Media በየጊዜው የክልሉን ብልሽት በተመለከተ በተደጋጋሚ የሚያቀርባቸው ዘገባዎችን እውነተኝነት ያረጋገጠ ሆኗል። አቶ ዳዊት በአሁኑ ወቅት የ4 ዓመት እስራት ተፈርዶባቸው በማረሚያ ቤት ነዉ የሚገኙት።

ይህ በእንዲህ ዓይነት ደረጃ የተፈጸመ ዝርፊያ እስካሁን ድረስ በፌዴራል መንግሥትም ሆነ በሚመለከታቸው የፍትሕ አካላት ምርመራ ያልተደረገበት መሆኑ የብዙዎችን ጥያቄ ሆኖ ቀጥሏል። WT Media እውነታው ተጣርቶ ሕጋዊ ተጠያቂነት እስኪሰፍን ድረስ ጉዳዩን በቅርበት መከታተሉን ይቀጥላል።